Pep uba shah kynnoh die lilam ïa ki jaka sha ki bym dei Khasi & Garo sha ka jingkhot hajir ka Hima Mylliem

0

Shillong, Naiwieng 02: Ka ophis jong u Syiem Mylliem ha ka sngi Balang ka la khot hajir ïa u Shutosh Sangma uba kam ïa lade u Rangbah Shnong jong ka shnong ba don ha ki thaiñ Pilangkata halor ka jingshah kynnoh ba u donkti ban die lilam ïa ki jaka puta jong ki Khasi bad Garo sha kiwei pat ki jaidbynriew bym dei na kine ki ar jaidbynriew hynrei na ka liang jong u um shym la wanmih satia sha kane ka jingkhot hajir ka ophis u Syiem ha Mawkhar.
Kane ka jingkhot hajir ka ophis u Syiem Mylliem ka long hadien ba na ka liang ka Hynñiewtrep National Youth Movement (HNYM) ka la ai da ka jingujor halor kane ka jingkynnoh donkti ïa u Shutosh Sangma ba u don kti ban die lilam ïa ki jaka puta bad ïa kane ka jingïalang khot hajir ha ophis u syiem Mylliem la shim pynïaid da u Basan bad ki Myntri ka Hima Mylliem, ha kaba la ïadonlang u Syiem ka Raid Marwet u Paiem Ken Sing Syiem bad ki nongshong shnong kane ka thaiñ bad ki nongïalam ka HNYM.
Haba kren sha ki lad pathai khubor hadien ba mih na ka jingïalang u President ka HNYM u Bah Louis Dohtdong u la ïathuh ba une u briew u la shah kynnoh ba u ai NoC sha ki Garo ba kin die ïa ki jaka jong ki sha kiwei pat ki jaidbynriew bym dei ki riewlum trai muluk jong ka jylla.
U la kam ruh ba ki don haduh 7 ne 8 tylli ki jaka puta kaba dei ka khyndew ka shyiap jong ki Khasi kiba une u briew u la dep ban die lilam sha ki wei pat ki jaitbynriew.

Leave A Reply

Your email address will not be published.