Nongstoiñ, Naitung 26: Kawei ka khynnah ba dang 14 snem ka rta, la lap ha u tyllai phasi ha kawei ka jaka khlaw kaba don marjan ka shnong ba ka sah, kata, ha ka shnong Tynrong Riangkhon, Mawshynrut West Khasi Hills.
Kane ka khynnah ka la jah la saw sngi eiei bad ki kmie ki kpa ki la leit ban pyntip ïa kane ka jingjia sha ki Pulit bad pynlong ruh ïa ka jingïawad paidbah ban lap ïa ka.
Hynrei ha ka step sngi Thohdieng, la lap noh ïa ka metiap jong kane ka khynnah ha u tyllai phasi na ka khlaw ba don marjan ka shnong.
Ki Pulit ki la register case halor kane ka jingjia bad ïa ka metiap la pynkit sha Civil Hospital, Nongstoiñ ban pyndep ïa ka post mortem.
Ka jingtohkit mynta ka la ïaid shakhmat ban pynthikna ïa ki daw ka jingïap.
