Tel Aviv, Risaw 14: Da ki hajar ngut k paidbah nongshongshnong jong ka Gaza ki la sdang ban phet shnong mynta ka sngi hadien ka jingmaham ka Israel ba kidei ban mih noh na la ki ïing ki sem ban phet sha ki bynta kiba sharum kaba dei ka phang jong ka lynti ban leit sha ri Egypt.
Napdeng ki paidbah kiba bun la ïohi ba don kiba la ïa da kjat da kaba ïalam ïa ki khun ki kti ryngkat ka kit ïa ki tiar ki tar katba lah ban kit na ïing, khamtam eh ïa ki jaiñ ki nep bad kiwei kiwei de ki tiar katba lah ban kit.
Don ruh kiba la shong bad leit da ki kada ban pynkit ïa ki tiar ki tar.
Don ruh kiba la phet da ki kali ban kit lang ïa ki tusok jong ki lehse kum ka jingpynkhreh ban thiah kat haba lap ka miet.
Kane ka jingphah phet ïa ka Israel ïa ki 10 lak ngut ki paidbah ka long hadien ba ka la thmu ban phah noh ïa ki Shipai jong ka ban ïakhun noh sa na ryngkew sha ki bynta jong ka Gaza da ka jingthmu ban pyliem noh ïa ki Lehnoh Hamas kum ka jingpynphai kylla ïa ki Hamas kiba la hiar thma ïa ka Israel bad pynïap dusmon da ki spah ngut ki briew ha kane ka Sngi Saitjain baladep.
Ka Israel ruh ha kajuh ka por ka la pynkhreh ïa ki Shipai ki Swar ryngkat ki tup ki man rung noh na ryngkew sha ki bynta jong ka Gaza.
