Ithuh ka sorkar ïa ka shnong Nonglang kum ka model village ha West Khasi Hills District

Nongstoiñ, Risaw 14 : Ka shnong Nonglang kaba hap ha West Khasi Hills, ka la ïoh ïa ka jingithuh na ka sorkar kum kawei ka model village hapoh ka jylla. Ka jingithuh kum ka model village ka la long ka jing kyrkhu kaba khraw ïa ki paitbah nongshong shnong, namar baroh ki tnad treikam jong ka sorkar kin phai khmat na ka bynta ban nang pynkiew shuh shuh ha baroh ki liang.
U bah Ailand Lyngdoh sordar jong katei ka shnong haba ïakren bad u nongthoh khubor, u la ong ba hadien ba ka sorkar ka la pynbna ba ïa katei ka shnong kum ka model village na ka liang ki rangbah jong ka shnong ki la pyrshang ban leit ïakynduh ïa ki ophisar jong ki tnad treikam bapher bapher, na ka bynta ban tip kiei ki projek kiba thymmai kiba ka sorkar kan pyntreikam ha katei ka shnong, na ka bynta ka jingmyntoi jong ki paitbah nongshong shnong.
Na ka liang ki ophisar jong ki tnad treikam jong ka sorkar, ki la ong ba ki don katto katne ki projek kiba ka jingpyntreikam ka la ïaid shait shait naduh ki snem ba la dep, kum ka jingsam bording ha kaba lajan baroh ki longïing ki la ïoh lut, hynrei ki don satang katto katne tylli ki longïing kiba dang don kam ban pynpoi bording.
U la ong ruh ba ha katei ka shnong ka projek shna surok ka dang donkam bha, hynrei haba leit ban ïakynduh ïa ki ophisar kiba dei jong ka tnad PWD, ki la ong ba kan dang kham shim por kumba katto katne. Namar ba mynta ka sorkar ka dang phiah bad peit bniah ïa ki shnong ki thaw kiba dei ban pynhap ha ka jingpeit jong Mawshynrut Civil Sub division bad ki ban pynpynhap ha ka jingpeit jong ka Nongstoiñ Division.
U bah Lyngdoh u la ong ruh ba na ka liang kiwei pat ki tnad treikam, ki la ong ba ka jingpynkhreh ban pyntrei kam ïa ki projek na ki ophis, ka shong ha ka jingbthah jong ka sorkar bad ki lah ban sdang ïa ka jingpyntrei kam katkum ki jingbtah ba la phah sha ki ophis ba kin peit kin khmih.
Haba phai pat ha jinglong jingman ha katei ka shnong ka la I donkam shisha ba ki tnad trei kam jong ka sorkar kum ka tnad ka koit ka khiah ka la I donkam haduh katta katta ba kan khmih bniah, namar ha katei ka shnong ka PHC ka la don lypa bad ka por ka la dei ban kyntiew kyrdan noh ïa katei ka Public Health Centre sha ka Community Health Centre bad ban pynbiang ruh ïa ki doctor, ki Nurses bad ki staff, khnang ban pynsuk ïa ki paitbah nongshong shnong jong katei ka thaiñ haba kiba pang ki shitom.
Nangta kum ka tnad ba peit ïa ka kam pynbiang um sha ki jaka rep ruh ka la donkam ban peit bniah, namar ka jingpynpoi um ha jaka rep kiba don ha katei ka shnong, ka dang long da ka rukom kaba rim bad ki don shibun ki jaka rep kiba donkam shibun ka um, hynrei ki shem jingeh ban pynpoi um sha ki jaka rep jong ki.
Ha kaba ïadei bad ka tnad ba peit ïa ka rep ka riang kum ka Agriculture ruh, ka la dei ban phai khmat bha sha katei ka shnong namar lajan baroh ki nongshong shnong ki dei kiba im da ka rep ka riang bad ki mar rep kiba kongsan ki dei u sying, synsar, ki soh ki jhur ki jhep bad kiwei kiwei bad kawei kaba kham ktah eh ïa ki nongrep ha katei ka shnong, ka dei ka jingïap khlam jong u sying bad kat haduh mynta ym pat don ki stad wad bniah kiba la leit ban pynshai sha ki paitbah nongrep kumno ban ïada bad kiei ki lad ban ïada na ka jingïapkhlam jong u sying.
Ha kaba ïadei bad ka pule puthi ka shnong Nonglang ka dei ka jaka pdeng jong ka thaiñ muliang kaba kynthup haduh ki jaka khappud bad ka Assam. Ki nongshong shnong ki dei kiba ïabeh haduh katta katta ïa ka jingnang jingstad bad ka shnong ka la ïaksaid katba lah ban kyntiew ïa ka pule puthi bad ha kine ki snem ba la dep ka la ïaksaid katba kot la ka bor ban kyntiew ïa ka secondary sha ka Higher Secondary, ha kaba la bun bha ki khynnah pule kiba la pass bha ha ki Final Exam ba la pynlong da ka MBOSE.
Kumta ki ar tylli ki tnad treikam jong ka sorkar kata ka Directorate of Health Service bad ka Directorate of School Education, ki la dei ban kham pynleit jingmut kyrpang sha katei ka shnong na ka bynta ka jingmyntoi jong ki paitbah.