Sdang kylladur ki ITI sorkar, phai khmat ki samla ban pynkupbor ïalade da ki jinghikai pyntbit – Bah Kit Kharkongor (Assistant Editor)

Shillong, Nailar 13: Ki samla ka Jylla mynta ki la sdang ban phaikhmat sha ki jaka pule kum ki Industrial Training Institutes (ITI) na ka bynta ban pynkup bor ïalade ha ki jait kam kiba donkam ïa ka jingshah hikai pyntbit na ka bynta ki jait kam ba ki kwah ban seng, ban trei lane ban pynïar ïa ka jingtbit jong ki.
Katkum ka jingïathuh da u Myntri ka tnad Labour ka Sorkar Jylla Bah Methodius Dkhar la ong ba ha kine ki khyndiat snem ki la ïohi shisha ïa ka jingkylla jong kine ki jaka hikai pyntbit jong ka sorkar kiba don ha kylleng ki distrik.
“Baroh shi katta ki samla ki ïa beh ban pyndep ïa ki Degree bad ynda ki la pyndep ki pynkhreh pat ban ïakhun ïa ki eksam kam bapher bapher ba ju pynbna da ka sorkar. Kumta man u snem da ki hajar hajar ngut ki samla ba pyndep ïa ki Degree katba ki kam sorkar kiba lait ki don tang khyndiat eh lada nujor bad ka jingdon jong ki,” u la ong.
Kumta, u la ïathuh ba ka long kaba sngewtynnad ban ïohi ba mynta ba ki khun samla hadien ba ki la pyndep ïa ka klas 10 ne klas 12 ki la phaikhmat sha ki ITI ban ïoh ïa ki jinghikai kiban pyntbit ha ki lain pule ba ki kwah.
Haba jubab halor ka jingkylli, u Myntri u la ïathuh ba ki ITI jong ka sorkar mynta ki dang long kawei na ki lad pule kaba kongsan ban ai jinghikai ha ki kam kiba donkam bha ha ka rukom trei kti bad ki sap trei ha ka jingsiew kaba duna bha.
Hapoh ka jingpeit jong ka Directorate of Employment and Craftsmen Training (DECT), u Myntri u la ïathuh ba ki lain pule ki ïapher na kawei ka ITI sha kawei pat. Tangba katkum ka jingïathuh jong u ki lain pule kiba ki samla ki kham phaikhmat ki kynthup naduh ka –
Electrician, Fitter, Mechanic Motor Vehicle (MMV), Welder, Wireman, Plumber, Draughtsman, COPA bad kiwei kiwei.
“Kiba bun ki samla kiba la pyndep ïa kine ki jinghikai kiba naduh 1-2 snem ki don kiba seng kam lajong bad don pat kiba ïoh kam ha ki kompeni bad don ruh kiba ïoh kam sorkar,” u la ong.
Da kaba kdew ïa ka jingdon jong ka Meghalaya State Skill Development Society (MSSDS)ruh ka dei shi bynta jong ka lad ban pyntbit ïa ka lawei ki samla ha ka sengkam sengjam lajong, u Myntri u la ong ba ka jingphai khmat ki samla sha ki lain pule ban pyntbit ha ki kam trei kti ka la dei lypa ka dak jong ka jingkyrmen.
Ha kajuh ka por da kaba Ïaroh ïa ka tnad baroh kawei khamtam ïa ki ophisar kiba trei borbah ban wanrah ka jingkylla, u Myntri u la ïathuh ruh ba mynta lei lei ki samla kim donkam shuh ban leit shaduh jaka ba don ki ITI ban leit shim ïa ki application form lane ban leit submit hi markhmat.
“Mynta ki khun samla ki lah ban aplai na la Ïing khlem donkam shuh ban leit sha ki ITI namar ka sorkar ka la leh online lut wat ban pdiang ïa ki application form,” u la bynrap biang.
Nangta u la ïathuh ba hadien ba la dep ban pdiang lut ïa ki application form, ka DECT kan sa pynmih ïa ka list jong ki nong aplai kiba la shah khot sha counselling, bad hadien kata kan sa pynmih ïa ka list jong kiba la shah jied.
Da kaba kubur ba mynta ka jingdon ki samla ba aplai ha ki ITI ka la palat ban ïa ki seat ba ki don, u Myntri u la pyntip ba ka sorkar kan sa pyrkhat wat ban kyntiew shuh shuh ïa ka jingdon ki seat ha kito ki lain ba ki samla ki kwah ban shah pyntbit.
Khatduh u la ong, “Ka long kaba sngewtynnad ban ïohi ba ki khun samla jongngi ki sngewthuh ba dei lyngba ka jingpynkup bor ïalade da ki jait kam ba ki don sap ba kin lah ban ïeng halor ki jong ki kjat katba ki dang ïakhun artad artad ïa ki kam sorkar.”