Shillong, Nailar 14: Ha ka sien kaba san ha ki saw tylli ki sienjam jong ka Durand Cup ka Shillong Lajong FC kan ïakhun pyrshah ïa ka NorthEast United FC, mynta ka kynti jong u snem 2026 kin ïakynduh ha ka QuarterFinal ban long ha JN Stadium, ha ka 17 tarik Nailar.
Ka Lajong ka la ïoh rung sha ka Quarter final kum ka lahduh jong ka Group E, katba ka NEUFC ka la wan ha khlieh duh jong ka Group F.
Haba kyrtiang dien, baroh saw tylli ki jingïakhun ba la dep hapdeng kine ki arliang mamla ha ka Durand Cup la jop da ka NorthEast United bad kan long ka kynhun kaba jwat ban pynliem. Ka long kaba jwat shisha namar ym pat don mano mano ba lah ban pynliem ïa ka NEUFC naduh u snem 2023, ha kaba ka NEUFC ka la jop ar sien lynter ïa ka Durand Cup ha u snem 2024 bad 2025.
Ha u snem 2023 ka Lajong ka la shah pynjemkhnap da 4-0 ha ka NorthEast United. Ka jingïalehkai kaba kham bha ha u snem 2024 ka la ïalam ïa ka Lajong ban poi shaduh ka Semifinal hynrei ka la shah pynkhyllem noh ha ka NEUFC. Ki la ïakynduh ar sien ha u snem 2025 – kawei ha ka group stage bad nangta ha ka semi final.
Mynta u snem ka NEUFC ka la jop ïa baroh lai tylli ki jingïalehkai group stage ha Guwahati pyrshah ïa ka Bodoland FC, Karbi Anglong Morningstar FC bad ka FC1 of Srinagar. Katba ka Lajong ka la pynliem ïa ka Nongkseh SSCC bad ïa ka Mumbay FC shuwa ba kan ïakhaid bad ka Langsning FC hynnin ka miet sngi Palei.
Ka Quarterfinal ba nyngkong kan long ha Ranchi Birsa Munda Football Stadium ha ka 16 tarik Nailar hapdeng ka SC Delhi bad ka FC Raengdai ha ka por 4 baje nohphai sngi. Ka SC Delhi ka la wan hakhlieh duh jong ka Group C, katba ka FC Raengdai ka la wan ba nyngkong ha ka Group D.
Ha kajuh ka sngi, ha ka por 7 baje janmiet, ka Indian Army kan aireng pyrshah ïa ka East Bengal ha Vivekananda Yuba Bharati Krirangan ha Kolkata. Ka Indian Army ka la pyndep ha khliehduh jong ka Group B katba ka East Bengal kadei kawei na ki kynhun ba wan ba ar ba kham kynsai; kaba ïakhun ha ka Group A.
Ka East Bengal ka la wan ba ar hadien ka Mohun Bagan, ka ban ïakhun ha ka Quarterfinal kaba lai ha kajuh ka madan ha Kolkata ha ka 17 tarik Nailar ha ka por 4 baje nohphai sngi pyrshah ïa ka Jamshedpur FC, kaba pyndep ha ka kyrdan ba ar ha ka Group C.
Hadien kata kan sa wan ka jingïakhun ka Lajong bad ka NorthEast United ha ka por 7 baje janmiet ha Shillong.
