Ka 7 tarik u Nailur dei ka sngi khatduh ba ai por ka sorkar ïa ki Doktor ban pyntip ba ki la pyndep MBBS da ka bhah sorkar

Shillong, Nailar 13: Ka tnat ka Koit ka Khiah jong ka sorkar jylla MI, ka la bthah ïa baroh kito kiba leit ban pule doktor na ka jingbhah ka sorkar jylla ba kin wan ai report hapoh mynta u bnai sha ka tnad ka koit ka khiah.
La ong ba kane ka batai shai shaphang ka jingthmu ba baroh ki Doktor kiba la pyndep ïa ka jingpule MBBS bad Post Graduate Degree, kiba ki dei ki doctor ba ka sorkar jylla ka la bei tyngka bad thung bhah kyrpang ïa ki ba kine ki doctor kim pat pyntip ïalade sha ka tnat ka koit khiah hadien ba ki la pyndep thikna ïa ki jingpule jong ki.
Lah ban ong ba ka sorkar kham mynshuwa ka la phah ki khubor lyngba ki shithi ha ka 8 tarik, Risaw 2024 bad 2 tarik, Ïaïong 2025, wat ka la pynmih ïa kito ki jingpynbna ha ka website sorkar, kine ki doctor kim shym la wan report.
Kumta halor kane ka sorkar ka bthah ïa baroh kito ki doctor ba ki dei ban wan report mar mar sha ka ophis jong u Director ka tnad ka koit ka khiah (MI) hapoh shi bnai naduh ka tarik ba mih kane ka jingpynbna, bad ka sorkar ka ai por haduh ka 7 tarik Nailur 2026.
La ong ba lada kim wan mih hapoh kane ka por, ka sorkar kan pynmih ïa ka hukum ban khot hajir halor ka jingkheiñ sting ïa ki kyndon kiba don ha ka kular kaba ki la ïateh bad ka sorkar kaba dei ka dulir ïateh kular kaba kila soi bad ka sorkar ha ki por ba ki dang leit ban pule.