Bthah ka Katakey Committee ïa ka sorkar ban pynsangeh ïa baroh ki kam tih dewïong bad shalan be-aiñ

Shillong, Nailar 13: Ka Justice BP Katakey Committee ka la ban jur ïa ka Sorkar jylla ban pynmih kyrkieh ïa ka plan ba treikam ha baroh kawei ka Jylla ban pynsangeh ïa baroh ki kam tih dewïong beaiñ bad ka jingshalan bad ban wanrah ruh ïa ka policy ban khangdam ïa ki hajar tylli ki par thliew khnai ba la shu iehnoh.
Katkum ka 39th Interim Report ba la aiti sha ka Ïingkashari ka Meghalaya High Court, ka Committee ka la pynsngew ba ïa ki jingbthah barim jong ka committee na ka bynta ka action plan ba bniah, ka dang sah beit kumjuh khlem pat pyntreikam.
Shuh shuh haba pynpaw ïa ka jingsngewkhia halor kane ka jingpynslem wat hapdeng ka jingbteng ki jingtih dewïong beaiñ, ka Committee ka ong ba ka long kaba donkam bha ban pynmih mardor ïa ka jingpynbna ïa ka plan ban khanglad, ban bat bad ban pyntreikam ïa ki jingbthah.
Katkum ka kaiphod, u Secretary ka Tnad Mining & Geoplogy u la pyntip ïa ka Committee ha ka 29 tarik Jylliew ba ka tnad ka la pynkhreh ïa ka draft jong ka action plan bad ka dangsah ban ïoh ïa ka jingmynjur ba khatduh.
“Ïa ka action plan kaba bniah bha yn sa pynmih jingpynbna hapoh ka 2 taïew,” kular u Secretary. Ka Committee ka la pynsngew ruh ïa ki jingma halor ki thliew par ba khlem jingker kiba buh ha ka jingma ïa ka jingim ki briew bad ki jingri jingdup.
Watla ka CMPDIL ka la aiti ïa ka DPR ban pynbha pat ïa ki jaka ha ki artylli ki par- Sutnga ha East Jaiñtia Hills ha ka jinglut ba T. 92.78 lak bad ka Arenggtim ha South Garo Hills ha ka jinglut ba T.63 lak-ka report ka pyni ïa ka jingbym don ki lad jingshngaiñ ha ki par.
Ka jingtyrwa ka dang ap ïa ka jingai jingbit na ka Oversight Committee ka NGT. Haba pynpaw ïa ka jinglong kyrkieh ka kam, ka Committee ka la ong ba ka Jylla ka dei ban wanrah ïa ka policy ban khangdam bad ker ïa ki thliew par khlem ka jingpynslem.