Sdang ka UDP ïa ka jingïalap elekshon ha West Shillong da ka rally ki thuk thuk ar shaka

Shillong, K’lyngkot, 21: Katba ki sngi ki la nang jan sha ka elekshon jong ka Iingdorbar Thawain ka jylla ka ban sa long ha ka 27 tarik u rymphang, 2023, ka United Democratic Party, West Shillong Constituency ka la sdang ïa ka jingïalap elekshon da kaba pynlong ïa ka jingïaid rally jong ki thuk thuk ar shaka ba la ïashim bynta da ki phew spah ngut ki paidbah.
Ha shwa ban sdang ïa kane ka jingïaid rally, u Bah Paul Lyngdoh uba long u kyrtong jong ka UDP na West Shillong Contituency u la kaweh ïa ka lama jong ka party kum ka jingpynsdang ïa kane ka jingïaid rally ha kaba kine ki nongïashim bynta ki la ïaid kylleng ki surok jong ki shnong kiba hap hapoh ka West Shillong Constituency.
“Kane ka jingïaid rally da ki thuk thuk ar shaka ka dei ka jingpynsdang ïa ka jingïalap elekshon da kaba rung sha ki kyndong kynshrot jong ka West Shillong Constiuency,” ong u Bah Paul Lyngdoh haba kren sha ki nongkyrshan ha ka jingïalang ba lyngkot ha shwa ban sdang ïa kane ka rally.
“Da kaba ngi pynher ïa kane ka lama (UDP) ngin pynskhem biang ba ngi dei ban kut jingmut lang kum ki nongkyrshan ba ngin ïakhun da ka bor jong ka mynsiem bad da ka jinglah jong ngi ban pynthikna ba ka Jylla jong ngi kan dei ka Jylla kaba don ïa ka jingkyrmen. Ai ba une u snem ba thymmai, ngin pynkhie im biang bad kaba donkam ka long ban pynkut noh ïa kane ka san snem kaba dap tang da ki jingbakla suda,” ong u Bah Paul.
Ha kane ka jingïaid rally la ïashim bynta da ki samla shynrang bad kynthei kiba shong ha ki thuk thuk ar shaka bad rah lang bad ka lama jong ka UDP da kaba pyrta “ha ka Bom” ha shilynter lynti.