Ai burom u Lat ka Jylla ïa ki nongïakhih Hill State kiba pynïoh jylla bapura ïa ka Meghalaya

Shillong, K’lyngkot, 21: U Lat ka Jylla u Brig. (Dr.) B D Mishra (Retd.) u la ai burom ïa ki nongïakhih Hill State kiba la noh ïa u synñiang u bynhei sha u sup u thiar ban pynïoh jylla bapura ïa ka Meghalaya 51 snem mynshwa, kata, ha ka 21 tarik, Kyllalyngkot, 1972.
Ki nongïalam ha ka jingïakhih Hill State ki long u Bah B.B Lyngdoh, u Bah Edwin Bareh, u Captain W. A Sangma, u Bah H. S Lyngdoh, u Professor G G Swell, u Bah Stanley Nichols Roy, u Bah H. Hynñiewta, u Bah Wilson Reade, u Professor R.S Lyngdoh bad bun kiwei pat kiba la aiti met bad mynsiem bad kiba la len lade ban pynneh pynsah ïa ka khyndew ka shyiap, ka riti ka dustur, ka ktien ka thylliej, ki pakit ka mynnor bad ka jingsynshar hi dalade ïalade.
Ka Jylla Meghalaya ha ka sngi Saitjaiñ ka la rakhe ïa ka jingïaid lynti sha u mawmer ka jingdap 51 snem kynthih ka jingïoh jylla bapura hadien ba la phiah na ka jylla Assam.
Ha ka jingrakhe kaba la long ha U Soso Tham Auditorium, Shillong, u Brig. (Dr.) B D Mishra (Retd.) u la long u Kongsan bad u Chief Secretary jong ka Jylla u Bah Donald P. Wahlang u la long kum u Symbud Kongsan.
U Lat u la ai khublei ruh ïa ki paidbah nongshong shnong ka jylla bad ong ruh ba kane ka dei ka jingsarong bad ka jingsngewkmen ban ïadon bynta lang ha kane ka jingrakhe.
U la pynkynmaw ruh ïa ki 51 snem mynshwa, haba ka Myntri Rangbahduh barim jong ka ri ka Indira Gandhi ka la pynïaid ïa ka jingïalang ha kaba la pynkha ïa ka jylla ba thymmai jong ka Meghalaya ha madan Polo Ground, Shillong. U la ong, “kane ka la pynurlong ïa ka jingangnud ba la slem jong ki paid Khasi, Jaiñtia bad Garo.”
U la bynrap ba ka jingïoh Jylla bapura jong ka Meghalaya ka long kaba shongnia bad ka dei ruh ka jingkhih jingksar jong ki paidbah wat kiba bun ki jingshah tynjuh, ka jingïatreilang jong ki nongïalam bad ka jingangnud jong ki paidbah namar ka jingri kyndon ïa ka riti ka dustur, ka la pynïoh ïa kane ka jylla kaba itynnat kaba ngi lah ban ong ba ka dei ka jong ngi.
U Lat u la kdew ruh ba ha ki 51 snem baladep ka jylla ka la kiew irat shaphrang ha ka rep ka riang, ka jngohkai pyrthei, ka jingpynmih bording, ka pule ka dangle, ka information technology bad ka jingpyndonkam ïa ki marpoh khyndew bad ka jingkut jingmut jong ka Sorkar ban pyndonkam ïa ki nongkynti da ka jingshemphang bad ban pyntyllun ha ka rukom badei ïa ka synshar ka khadar khnang ban kyntiew ïa ka roi ka par ha baroh ki liang.
Shuh shuh u la ai khublei ïa ki nongïoh khusnam Meghalaya Day Excellence Award na ka bynta u synñiang u bynhei ba ki la noh ha ka kam shakri paidbah.
U Bah Donald P. Wahlang haba kren kum u Symbud Kongsan u la ong ba ka jingïakhun ban ïoh ïa kane ka jylla kaba itynnat kaba la neh da ki snem ka long khlem da ka lynti jong ka jingïaumsnam, hynrei da ka jingïatyllang bad ka jingïaksaid jong ki paidbah ka jylla.
U la bynrap ba ha ka 21 tarik, Kyllalyngkot, 1972, ka kolshor, ka ktien ka thyllien, ka jingieid ïa ki jingrwai tynrai, ka bam tynrai, ka jingangnud jong ki paidbah ka Jylla Meghalaya ka la wan urlong da ka jingïoh jylla bapura ban ïasnoh bad ka dewbah India.
U Chief Secretary u la kdew ruh ïa ki sienjam ba la shimkhia da ka Sorkar Jylla ban ïakhun ïa ki jingshah tynjuh kiba la mad da ka jylla ban pynjanai ïa ka jingshakri ha ka pule ka dangle, ka koit ka khiah, ka jingkyntiew ïa ki nongkyndong, ka rep ka riang bad ka bording.
Ha kane ka sngi, u Lat ka Jylla u la aiti ïa ka khusnam Meghalaya Day Excellence Awards 2022 sha ki 18 ngut ki shakri sorkar halor u synñiang u bynhei ba ki la ai jingshakri sha ki paidbah bad sam ruh ïa ki khusnam sha ki nongjop ha ka Meghalaya Day Run ba la pynlong da ka Directorate of Sports & Youth Affairs.
La pynbna ruh ha kane ka sngi, ïa ki kyrteng jong ki briew kiba la ïoh ïa ka Meghalaya Day Awards 2023. Ki nongjop ha ka U Tirot Sing Award 2023 ha ka Arts and Culture ba la jied ïa i Kong Sweetymon Rynjah, ka khusnam Pa Togan N Sangma Award 2023 for Social Service la jied ïa ka Dr. Jennifer V. Basaïawmoit bad ka khusnam U Kiang Nangbah Award 2023 for Sports la jied ïa u Klingson D Marak.
Katba kiba ïoh pdiang ïa ka khusnam Governor Police Medals for Meritorious Service, 2023 ki long u Additional Superintendent of Police u Shabbir Sayeed Dkhar, u Deputy Superintendent of Police (DSB) u Vincent Nengminza Sangma, u UBSI u Bah Ïailamlang Iongi Jyrwa, u UBSI Sean Stanford Lywait, ka WPSI ka Renu D Momin, u Havildar u Bah Mewan Roy Pakma, u Havildar Bah Amplias Synnah, u Bah Alphonse Lyngdoh na ka BN/975 bad u Pyarson R Marak uba dei u Fireman.