Da u Prah ïoh ka VPP kum ka shab ïakhun elekshon

Shillong, K’lyngkot 21: U President ka Voice of the People Party (VPP) u Bah Ardent Miller Basaïawmoit ha ka sngi Saitjaiñ u la ong ba ka party kumba la seng halor ka nongrim jong ka synshar khadar bakhuid ba suba kumta lyngba u Prah kan weng kan khalah lut ruh ïa ka synshar khadar kaba bamsap, ka jinglehbor bad ki jingshadien jong ka jylla.
Haba kren ha ka jingpynlait paidbah ïa ka shab ïakhun elekshon jong ka VPP laba la pynlong ha Smit u la ong ba kumba man ki thliew ïing ki don beit ïa u prah na bynta ban pyndonkam ban jied khaw khnang ban pynïakhlad ïa u khaw hapdeng u maw, u stait, u kba bad kiwei kiwei kiba don lang ha u khaw kumta ruh lyngba u Prah ka VPP kan weng kan kdat lut ïa ka synshar kaba sniew, ba bamsap, ba lehbor ha ka jylla.
“Da u prah ngin ïakhun elekshon bad ngin pynthikna ba kumba ngi ïeng ha ka nongrim ka synshar khadar bakhuid kumta ruh ngin leh shisha lyngba u prah uba ki paidbah kin pynkhmati ïa ngi ha ka elekshon,” u la ong.
U la ong ruh, “Lada don ka synshar kaba khuid baroh kin jia beit jia ryntih ha ka jylla ki kam synshar khadar bad dei ka synshar khadar kaba khuid ka tynrai jong ka kam synshar khadar bad lada kam don ka jingsynshar kaba khuid ka jingkulmar bad jinglymmuh ha ka synshar khadar kan wan jia,” u la ong.
U la kam ruh ba ka jingwan ki paidbah ba wan shim bynta sha ki jingïalang kiba ka VPP ka kot wat la kin hap ban sei hi ka bai leit bai wan, kin duh bai sngi ka la paw shynna ba ki paidbah ki la kwah ban ïohi noh ïa ka jingkylla ha ka synshar khadar lyngba ka VPP.
“Ngim pynbiang bai leit bai wan, ngim pynkhreh ki bos ki trok hynrei ngi shu pyntip beit ba ngin lum jingïalang bad katne u paidbah u poi ka la dei hi ka sakhi aiu ki paidbah ki angnud ha kane ka elekshon” u la ong.
Haba ki nongthoh khubor ki kylli ha kano ka rukom kin ïakhun pyrshah ïa ka bor ka pisa, u Bah ardent u la ong ba kam ba ka VPP kan ym mad jingeh satia ban ïakhun khlem ka pisa namar “ngi don ka buit kumno ban ïakhun elekshon khlem theh pisa”, u la ong.
“Khlem pep ka pisa ka dei kawei na ki lad ban ïakhun elekshon hynrei kam dei tang ka lad pat ban lah ban jop elekshon. Ngi ka VPP ngim lah ban pdiang daleilei ban jop elekshon da kaba thied vote.” u la ong.
U la ong ruh ba ka VPP kan ïakhun marwei ïa kane ka elekshon khlem da ïatehlok bad kiwei pat ki seng saiñ pyrthei.
“Naduh kaba sdang ngi la kren shai ba ngin leit marwei sha u paidbah ha kane ka elekshon bad ngin ym kynran dien noh na kaei kaba ngi la khlei naduh ka sngi kaba nyngkong.” u la ong.
U la ïathuh ruh ba kumba long mynta ka party ka la dep ban pynbna 16 ngut ki kyrtong bad ha kine ki sngi kiban dang wan ka party kan sa pynbna sa katto katne ngut.
“Dei namar ki ïohi ba ki paidbah ki kyrshan ïa kaei kaba ngi kum ka party ngi kren bad ngi angnud ban pyndep ba kiba bun bah ki riew rangbah bad ki riew donburom kiba don kajuh ka seng pyrkhat bad ka party ba ki wan shakhmat ban ïakhun ïa kane ka elekshon,” u la ong.
“Kumba ha ka dorbar u Khasi ha ki por ba kham mynshuwa haba don ba lamler ha dorbar ki ju ong nai ktah shuh da ka kti hynrei khalah da u prah sha kharai kumta haba don mano mano ba kren lamler mynta jubab beit Wat kren lamler shuh ïoh ngin khallah da u prah u Bah Ardent bad ka VPP,” ai jingkynthoh u rangbah Shemborlang Rynjah halor u symbol jong ka VPP.
U Bah Adelbert u la ong, “Kumba ka jylla ka la shah shukor ha kine ki 51 snem kiba la leit mynta ka kynti ngin pynthikna ban khallah kut sha kharai ïa kine da u Prah.”