Shillong, Kyllalyngkot 21 : Hadien ba ka Election Commission of India (ECI) ka la dep ban pynbna ïa ka tarik ban pynlong ïa ka election ha ka jylla ha kaba ka jingthep vote kan long ha ka 27 tarik Rymphang 2023, ka Model Code of Cunduct (MCC) ruh ka la treikam noh naduh ka sngi ba pynbna hi ïa ka election bad ha kajuh ka por la pyntreikam ruh ïa ka kyndon aiñ 144 CrPC ban khang ban ym lah ban rah pisa palat iaka 50 hajar tyngka ha ka met haba leit ba wan sha kano kano ka jaka ruh.
Kumta halor kane ka nongrim ki Pulit, ki Flying Squad bad ki Surveilance Team kiba dei peit ha ka Umkiang Out Post ki la pynlong ka jingtalasi kaba tyngeh ha katei ka jaka naduh ka 19 tarik hi bad tang ha katei ka sngi ki la ïoh ban kurup haduh 10.72 lak tyngka ka pisa na ki briew kiba leit ba wan lyngba katei ka jaka. Ha ka sien ba nyngkong ki pulit ki la ïoh ban kurup shwa 1.85 lak tyngka, ha ka sien kaba ar 2.875 lak tyngka bad ha kaba lai 6 lak tynkga bad kumta ter ter bad baroh ka pisa ba la kurup ka long 10.72 lak tyngka.
ïa katei ka pisa la kurup noh da ki pulit ban tohkit na kiba rah ïa ka pisa nangno ki ïoh ïaka pisa bad ki mut ban leit ai ne leit rah shano.
Kane ka jingpyrkhing ka long ban khanglad ban ym ïoh pyntreikam ïa ka pisa ha kane ka election khamtam ha ri lum Jaintia ba ka jur ka jingkynnoh ba ka jingïather pisa ka jur bha la jan haman la ki constituency.
Ki bor pynïaid district ki la ïathuh ka jingpyrshang ban wanrah ïa ka election kaba khuid bad suba ka long naduh ka jingweng ïa ki dur ki dar, ki poster, ki flex, jong ki party bapher bapher ha East Jaintia Hills kumba la bthah da ka ECI. Nalor kata ka jingtalasi ban kurup ïa ka jingdie kyiad beaiñ ruh ka bteng man la ka miet ha East Jaintia Hills.
ïa kane ka pisa ba la kurup la leh da ki pulit hakhmat ki Majistor. Na ka liang ki bor pulit hadien ba la kurup ïa ka pisa kin sa ai da ka slip sha kito kiba rah ïa ka pisa bad kine pat kin hap ban ai da ka jingthoh pat sha ka Committee kaba kynthup ïa u DEO, ADC, Treasury Officer ba kan sa bishar bniah ïa ka pisa. Lada ki lah ban pynshai bad pynshisha nangno ki wanrah ïa ka pisa bad ki mut ban leit rah shano ne pyndonkam shano, kin sa ïoh biang ïa ka pisa hynrei lada kim lah ïa ka pisa yn sa kurup syndon pat kat kum ki kyndon jongka aiñ.
Nalor kata lada jia ba ki bor pulit, ki FST, SST ki ïoh jingtip ba ka don ka jingbuh pisa kaba bun bha ha kano kano ka jaka ne ka ïing, kine kin shu ker kut ïa ka ïing bad yn sa wan da ki briew na ka Income Tax ban rung shapoh bad khynra ïa ka ïing bad ka Income Tax kan sa leh lut ïa kiba donkam baroh
