Shillong, Lber 13 : Ka lympung ïalehkai kriket U-15 Inter District Cricket Tournament 2023 ba pynïai da ka Meghalaya Cricket Association ka la sdang mynta ka sngi Nyngkiong ha Ri Bhoi. Katei ka tournement ka long ruh kum shi bynta ban pynkhreh na ka bynta ban mihkhmat ïa ka jylla sha ki jingïalehkai national kiban wan.
Mynta u snem, man kawei ka jingïalehkai yn pynlong ha ki ar sngi da ki ar inning kawei kawei ka kynhun. Ki ar tylli ki jaka ïalehkai ba ka MCA ka la jied ki kynthup ha Umbuda kaba ha Ri-Bhoi bad ha Williamnagar, East Garo Hills.
Ka Zone 1 ha Umbuda ka la sdang mynta ka sngi Nyngkong hapdeng ka Shillong Cricket Association-A pyrshah ïa ka Ri-Bhoi District Cricket Association. Katba ka Zone 2 kan sdang ha ka 15 tarik Lber.
Ha kane ka sngi sdang la wan ban ïadonlang u Vice President jong ka MCA uba dei ruh u President jong ka RBDCA u Bah Rayonald Kharkamni, u Honorary Secretary ka MCA u Bah Gideon Kharkongor, Honorary Treasurer u Dhrubajyoti Thakuria, U President jong ka East Khasi Hills Cricket Association President ha kajuh ka por u Chairman jong ka Tournament Committee jong ka MCA u Bah Dister Marbaniang, ki dkhot jong ka SCA, RBDCA bad ki nongpynïaid ïa ka jingïalehkai.
U Bah Gideon Kharkongor u la pynpaw ba ki player ki donkam shuh shuh ka jingtreii shitom, u la ai mynsiem ruh ïa ki ban pyrshang kamai bun ron lyngba kane ka jingïalehkai, khnang ba kin lah ban ïalehkai bha ha ki tournament jong ka BCCI, kum ka Vijay Merchant Trophy.
Ha ka sngi sdang jong katei ka tournament, ka Ri-Bhoi ka la shah pynkhyllem lut baroh ki wicket da kaba kamai 107 kaba dei ka inning kaba nyngkong katba ka SCA-A kaba la beh ïa katei ka thong ka kamai 60 ron. Ka Ri-Bhoi kaba la tied biang ka kamai 135 ron (all out), ha kaba ka SCA-A kan hap ban beh ïa ka ron ba 183 ban jop ha ka jingïalehkai kaban long mynta ka sngi Ba ar
Ka Ri-Bhoi, kaba la hap ban tied nyngkong hadien ba ka khlem jop ka jingkynting pisa, ka la kamai 26 ron duh noh 7 wicket ha ka inning kaba nyngkong shuwa ba u Gaurav Narleng u la wan ban mih madan ban kamai da 42 ron. U Narleng ryngkat u Sanjay Sawkuta (17) bad u Benedict Jones Makdoh (14) ka la ïarap ïa ka Ri-Bhoi sha ka jingkamai ba 100 ron. U Aashish K Lohar u rangkawang bol sdang u la lah ban khur marwei 6 wicket ai kamai 38 ron katba u Gaurav J Thakuria u ïoh 2 wicket ai kamai 29 ron.
Ka SCA-A haba beh ïa katei ka thong ka khlem da lah ban kamai ron bad dei tang u Lohar uba kamai bun ron da 23 ron. U Narleng (3/11) bad u Makdoh (3/30) ki khur mar lai wicket, katba u Suraj Kapri (1/6).
Ka Ri-Bhoi ka la duna kamai ron ha ka inning kaba ar, da kaba kamai 47 ron duh noh 6 wicket, hynrei u Narleng u ïoh ban kamai 26 ron, katba u Sawkuta u kamai half century da kaba khyrwit 52 ron na ki 40 bol. U Makdoh, u kamai 30 ron na ki 27 bol ha kaba kitei ki arngut ki kamai lang da 74 ron ha ka jingduh noh ki phra wicket. Ki san ngut ki rangkawang bol ka SCA-A ki la ïoh ban khur wicket, ba kynthup u Rithick K Kshir (2/7), Lohar (2/33), Advay Ratan Surana (2/39) bad u Thakuria (2/44) kiba ïoh khur mar ar wicket katba u Mewankitbok M Kharpuri u ïoh 1/12.
Ki team kiba don ha ka Zone 1 jong kane ka tournament ki kynthup ka SCA-A, RBDCA bad ka SCA-B kiba ha ka Group A katba ka East Khasi Hills Cricket Association, East Jaintia Hills District Cricket Association bad ka West Jaintia Hills District Cricket Association ki don ha ka Group B.
Ha ka Zone 2 ki team kiba ïalehkai ki kynthup ka Tura District Cricket Association, South Garo Hills District Cricket Association bad ka West Khasi Hills District Cricket Association ha ka Group A bad ka East Garo Hills District Cricket Association bad ka North Garo Hills District Cricket Association ki don ha ka Group B, ki ar tylli ki team ha ka Group B kin ïalehkai mar arsien.
Ki rangïalehkai jong ka SCA-A : Aashish K Lohar, Dipayan Nandi, Arman Chettri, Rithick K Kshir, Samelawan S Nongkseh, Rudra S Rathor, Mewankitbok M Kharpuri, Rohan Moor, Vedanth Vadera, Rohit Sharma, Gaurav J Thakuria, Abagtha JK Marak, Advay Ratan Surana, Krishiv Chaudhary.
RBDCA : Benedict Jones Makdoh, Soojal Roy, Gaurav Narleng, Sanjay Sawkuta, Pynshai S Timung, Rocky Saha, Nobojit Chettri, Suraj Kapri, Keshab Shah, Anmol Kr Shah, Vikram Marbaniang, Adrian Rymbai, Aryan Tomar, Manbhalang L Marshillong, Pawan Subedi.
