Hadien ka jingïakhluit bad ka jingkawang ktieh ha kine ki bnai ba la long ka elekshon, mynta ka sorkar ba thymmai ka MDA kan sdang ban treikam noh naduh ka 7 tariku bnai Rymphang 2023, ka sngi kaba ki 12 ngut ki Myntri ka sorkar Meghalaya kin bam smai.
Ki 12 ngut ki Minister ka sorkar MDA 2 ki long u Conrad K Sangma kum u Myntri Rangbah. Ki Myntri pat ki long u Bah Prestone Tynsong, Bah Sniawbhalang Dhar kiba lah ban ïoh ïa ka kyrdan Symbud Myntri Rangbah,u Bah A L Hek, Dr. M Ampareen Lyngdoh, Bah Paul Lyngdoh, Bah Comingone Ymbon, u AT Mondal, Bah Kyrmen Shylla, u Marcuise N Marak, u Rakkam A Sangma bad Bah Bah Shakliar Warjri. Da kane ka jingrung kine ki kyrteng kamut ba ki Myntri kiba rim ne ki Myntri jong ka sorkar MDA 1, kiba duh Myntri ki long u Bah Lahkmen Rymbui, Bah Renikton Lyngdoh Tongkhar, Bah Baiteidor Lyngdoh ki la duh noh ban long Myntri ha kane ka sorkar ba thymmai wat lada ki la jop biang kum ki MLA.
Kane ka sorkar kan don ki nongïalam ne kiba la rangbah ha ka kam kum u Conrad Sangma, u Bah Prestone Tynsong, u Bah Sniawbhalang Dhar kiba la bteng na ka sorkar kaba rim bad khlem pep ka MDA 2 kan bteng beit ïa ki kam kiba dang sahteng jong ka MDA 1. Kiba dang thymmai kum ka Dr. Ampareen Lyngdoh, Bah Paul Lyngdoh, Bah Comingone Ymbon, Bah Shakliar Warjri, u AT Mondal, u Rakkam Sangma, u Marcuise Marak kin hap ban bud ïa kaei kaba kaba ka sorkar barim ka la trei.
Ki kam ba dang sah ha ka MDA 2 ki long kaba hakhmat eh kadei ka jingïapynbeit pud ïa ki hynriew tylli ki jaka ba dang sah bad ka Assam, ïa kaba la pynsangeh noh hadien ka jingmih ka jingka jingïasiat ha Mukroh, kaba la shim ïa ka jingim jong ki 5 ngut ki briew. U Myntri Rangbah u Conrad Sangma, ula shimkhia bha ïa kane ka kam kum ka kam kaba hakhmat eh jong ka sorkar MDA 1. Kawei pat ka kam kadei ka jingpyndep ïa ka jingtei ïa ka ïingdorbar kaba thymmai kaba la sangeh noh ka jingtrei hadien ka jingkhyllem jong u Dome ne u tnum pyllun ha ka por ba dang shna. Nangta kan hap ban pyndep ruh ïa ka jingpynkynriah ïa ka Them Metor na ïew Mawlong kaba la long ka kam kaba la sahteng naduh ka snem 2018 haba la bthei ka jingïakhih kaba jur ha katei ka snem.
Ka kam kaba khamkhia ïa ka MDA 2 kadei ka jingpyndap ïa ka pla tyngka jong ka sorkar kaba la ring tyrkhong namar ka jingkhangtih dewïong ka NGT naduh u snem 2014. Mynta ruh kane ka kam ka dang sah ponding, ha kaba hadien ki jingshimbishar kiba bunsien la bthah ïa ka sorkar jylla ban shna ïa ki kyndon kiba bun ryngkat ka jingwanrah ïa ka rukom treikam ban ïada ruh ïa ka mariang.
Ka jingtreikam ka MEeCL kadei kawei pat ka bynta kaba hakhmat eh ïa ka sorkar thymmai, namar ba kane ka tnad treikam ka la mad bun ki jingeh haduh ba ki nongtrei ki la ïakhih na ka por sha ka por.
Ka MDA kan hap ban pynkhreh lyngba ruh ïa ki jingïakhih kiba lah ban mih na ki ishu sahteng kum ka ILP, ka Reservation Policy, ka jingpynrungïa ka ktien Khasi bad Haro ha ka Khyrnit kaba phra jong ka Riti Synshar ka ri India. Nangta ka jingeh na ka jingbym ïoh tulop thikna ki Nonghikai skul SSA, Adhoc bad kiwei kiwei. Ka jingbym ïoh kam ïoh jam ki Samla bad kiwei kiwei de, ïa kaba ka sorkar thymmai ka hap ban peit.
