Rakhe ka DLSA ïa ka sngi ba kyrpang ki longkmie ha St. Francis D’Assisi School, Mawthawïang

Mawkyrwat, Lber 13: Ka ophis jong ka District Legal Services Authority (DLSA), South West Khasi Hills District kum shibynta ban ïasnohkitlang bad ka pyrthei baroh kawei ka la ïoh ban rakhe ïa ka sngi ba kyrpang jong ki longkmie ne ka International Women’s Day 2023 hapoh ka St. Francis D’Assisi School, Tynsom, Mawthawïang, South West Khasi Hills District.
Ha kane ka sngi la ïoh jingkren bad jingpynshai shaphang kane ka prokram ba kyrpang na ka kong D. Sohtun, MJS, Chief Judicial Megistrate-cum-Secretary, District Legal Services Authority (DLSA), South West Khasi Hills District bad ka jingkren pdiang sngewbha na u Brother Barnabas Lyngdoh, Principal jong ka St. Francis D’Assisi School, Tynsom, Mawthawïang.
Ka kong Noshmi Hahshah, Panel Lawyer jong ka District Legal Services Authority (DLSA), South West Khasi Hills District ka la kren halor ki lad jingïaid lyngba ka aiñ kaba ïa dei bad ki kynthei ne ka Protection of Women from Domestic Violence Act 2005. Ka la ong ruh ba ki don bun bha ka jingñiewshiliang ne ka jingbym ryngkat dor bad ki kynthei bad dei na kata ka daw ba ki mih ki aiñ ba ïa dei bad ki kynthei. Ka la ban ba ka don ka jingïapher ha ka imlang sahlang kum ha ka jingphah leit skul, ki kam ki jam, ka jingsiew duna dor haba trei ïa kajuh ka kam kumba trei ki shynrang bad kiwei de. Ka la ong ba ki kynthei kim dei ban long tang ki nongsumar ïing hynrei ki dei ban tur ha ka imlang sahlang bad peit ïa ka roi ka par.
Ka la kyntu namarkata, ba ki kynthei ki dei ban ïeng ha la ki jong ki kjat ban pyntip ha ki bor jong ka aiñ khnang ba kin lah ban ïoh ki lad jingïarap. Bunsien ki briew ki kynnoh ïa ki bor jong ka aiñ hynrei ka daw ba nyngkong ka long ba ki briew kim pyntip sha ki bor jong ka aiñ ïa ki kam sniew, ka la ong. Kumta ka la ban, ba lada kim sdang ban tehlakam na ki kam sniew kiba rit ki briew kin sa sdang ban leh ki kam sniew ba khraw ha ka imlang sahlang. Ka la ïathuh ba ki kam sniew pyrshah ïa ki kynthei ki kham bun ban ïa ki kam sniew ïa ki shynrang.
Ha kajuh ka por ka kong Noshmi Hahshah ka la batai ruh ba ka sorkar lyngba ka District Legal Services Authority (DLSA) ka ai ïa ki lad jingïarap katkum ka aiñ khlem da donkam ban siew pisa ei ei ïa ki plidar. Ka la batai ruh ba kino kino ki mukotduma ba ïa dei bad ki kynthei ki lah ban ïoh lyngba ka District Legal Services Authority (DLSA) ban ïaleh pyrshah ïa ki kam sniew ha ka imlang sahlang.
Katba ha ka jingkren jong ka kong D. Sohtun, MJS, Chief Judicial Megistrate-cum-Secretary, District Legal Services Authority (DLSA), South West Khasi Hills District pat ka la ïathuh ïa ki katto katne ki aiñ bad ki lad jingïarap na ka bynta ki kynthei kiba la shah ieh ne shah leh beiñ ha u lok kata ba ki lah ban dawa bai bam na uta u briew tat haduh ba ka kynthei kan ïoh da uwei pat u lok. Ka la ïathuh ruh ba na ka bynta ki khun, ka lok ka lah ban dawa bai bam na u lok ha kaba ïa ka khun kynthei tat haduh ka por ba kan da leit ïing briew bad na ka bynta u khun shynrang pat haduh ba un da don 18 snem karta bad kane ka dei kata ka aiñ ka ban ïada na ka bynta ki kynthei halor ka bai bam.
Namarkata, ka la kyntu ïa ki kmie ki kpa ba haba ki wanrah ïa ki khun ki kti ha kane ka sla pyrthei ka dei ka kamram jong ki ban ri ban sumar bad ban ai ruh ha ki ïa ka jingnang ka jingstad bad ka bam ka dih kaba paka. Ka la ban ruh ba kum ki kmie ki kpa ki dei ban ai ka jingnang jingstad ïa ki khun ki kti khnang ba ka lawei jong ki ruh kan nym long ka lawei kaba sah dum hynrei kan long ka jingshai na ka bynta jong ki hi ba kin tip ïa kaei ba ki dei ban leh da ki ïa kynduh ïa ki jingeh ha ka jingim.
Ha ka jingkren jong ka la ïathuh ruh ba ka aiñ ka don ba la khang pyrshah ban phah trei ïa ki khynnah kiba rit ha ki kam kiba khia kiba ktah ïa ka koit ka khiah jong ki bad kane pat kam mut ba ki khun kim lah shuh ban ïarap kam ha ïing ha sem hynrei ka khang ban pyntrei ha ki kynja karkhana bad kiwei de ki jaka. Ka la ong ruh ba lada don ki para khynnah khamtam kiba la kham heh ki leh ki kam ba lai phew jait ba ki shoh ki dat beiñ bad leh ki kam bymman kim dei ban sngap jar jar kum ïa kine hynrei ki dei ban mih shakhmat ban pyntip sha ki bor jong ka aiñ khnang ba kin sa leh ïa kaba donkam.
Haba kren ai jingkyntu na ka bynta ki khynnah skul, ka kong D. Sohtun ka la ong ba kum ki khynnah skul ki dei ban don ka thong ryngkat ki jingtrei shitom ha ka jingim jong ki namar lada ki leit skul khlem ka thong shakhmat kata ka jingshong skul jong ki kan sa long leh noh ei.
Ha ka jingkren pynkut, ka kong D. Sohtun ka la buh ka jingkyrpad ïa ki longkmie bad ki riew kynthei ba lada ki don kano kano ka jingshah leh beiñ ne shah ñiew beiñ ïa ki hok ki jong ki sngewbha wat ju sngap jar hynrei ki dei ban mih shakhmat ban pyntip khnang ba ka aiñ ka lah ban ïarap na ka bynta jong ki.
Ïa ka jingkren khublei la ïoh na u babu George Shangpliang.