Nongstoiñ, Lber 13: Na ka bynta ban pynjan ïa ka leit ka wan bad ban pynsuk ïa ka la leit ka wan ki paitbah nongshong shnong ka thaiñ rimen, ba kynthup ïa ki shnong naduh Pungphreit, Mawlongbah, Mawdet, Mawkhiat, Rynñiaw, Umshem, Umyiap bad kiwei kiwei, ki la kyntu ïa ka sorkar ba kan sngewbha ban phai khmat lem sha katei ban pynpoi surok sha katei ka thaiñ, khnang ba kin lait na ka jingeh ha ka leit ka wan ka kit ka bah.
U Bah B.I. Nongsiej uwei na ki nongïalam jong ka synjuk ki nongsynshar shnong katei ka thaiñ haba ïakren bad u nongthoh khubor, u la ong ba hadien ba u kontraktor u ba pyntrei ïa ka surok PMGSY na shnong Umjaut haduh Mawrok, ka la I donkam haduh katta katta ban don sa kawei ka surok na shnong Mawdet shaduh Langpih kaba dei ban ïaid lyngba ïa ka shnong Mawshad, Mawkhiat, Rynñiaw Umyiap, Miangbyrkong haduh Langpih.
U la ong ba haduh mynta ki nongshong shnong na kitei ki shnong lada ki leit donkam sha ki thaiñ Langpih ki hap ban kiew arted sha Rambrai, Nongstoiñ bad ki sa hiar shaphang sepngi ha ka jingjngai kaba palat ïa ka phra phew kilomitar. Katba na Mawdet haduh Langpih lada ïaid lyngba ka Mawkhiat, Rynñiaw haduh Langpih, ka jingjngai ka long tang kumba khathynriew kilomitar ei ei.
U bah Nongsiej u la ong ruh ba katei ka thaiñ ka dei kaba duna bha ha ka jingdon ki surok kali, wat la ka dei ka thaiñ kaba seisoh haduh katta katta ha ka rep ka riang, hynrei namar ka jingbym don ïa ki surok kiba biang, bun bah ki
mar rep ki shu pyut ei, namar ka jingjngai palat ki jaka ba lait kali.
Ha kaba ïadei bad ki jingeh na ka ki paitbah ki la ong ba kiba bun kiba pang jingshitom kim ju lah ban poi ha ki jaka sumar, namar ka shem jingeh haduh katta katta ban kit da u briew bad ban ïaid kjat da ki bun bun kynta tang ban poi haduh Rambrai ka jaka ba la don ka PHC.
Ym tang katta hynrei ki lynti ïaid kjat ruh ki dei ki lynti kiba hap ban ïaid lyngba ki khlaw ki btap ban ban kiew ïa ki thiep bad hiar ïa ki jur kiba jrong bha, kumta ka pynshitom haduh katta katta ïa ki paitbah.
Ki la ong ruh ba ka jingpynshlur jong ka sorkar ïa ki longkmie ba ar met ba kin pynbiang ban leit phah sumar ha ki Hospital bad ban leit kha khunlung, hynrei na ka bynta ki nongshong shnong katei ka thaiñ kam don jingmut satia, namar nalor ba kiba pun khun kin ïaid da ka kjat san haduh hynriew kynta man ka taïew kin ym lah satia.
