Nongstoiñ, Lber 13: Haduh kine ki sngi ka jingpyndik jong ki briew ka sorkar Assam ïa ki paitbah Khasi kata naduh ki riew rangbah, ki longkmie bad ki samla kiba shong ha khappud ka dang ïai bteng na kawei ka kam sha kawei ka kam.
Dang ha ka hynriew tarik mynta u bnai u bah Biliroi Samakha sordar jong ka shnong Umbah kaba don ha ki thaiñ Kyrshai, ka shnong kaba dang hap hapoh u pud u sam jong ka hima Nongmynsaw, u la ong ba u la shah pyndik ha uwei u ophisar jong ka tnad forest jong ka Assam u ba don ha ka ophis jong ka forest ha Ukiam.
Utei u Sordar jong ka shnong Umbah u la ïathuh ba utei u ophisar jong ka Assam forest, u la wan khot ïa u na ïing ba un leit shapoh ophis ha Ukiam. La ong katba dang ïaid lynti utei u ophisar u la kylli tohkit lai phew jait, ba la u dei ne em u sordar shnong bad haba u la jubab ba u dei, u la kylli biang la u ju pom dieng ne em, ha kaba utei u sordar ruh u la jubab ba um shym la pom dieng satia. Nalor kata utei u ophisar u la kylli biang ïa u ba u don ne em ïa ki kot patta na Assam ha kaba u la jubab ba um don hynrei u don tang ïa ki kot khyndew kiba dei na Meghalaya.
Haba la poi ha ophis utei u ophisar u la ong ba un phah kem noh ïa u, kumta u la sei ïa ka mobile jong u ban phone sha u OC jong ka Langpih BOP bad ha kata ka por utei u ophisar u la knieh ïa ka mobile jong u bad u la ieng na ka shuki bad u mut ban khang kut ïa u hapoh katei ka kamra hynrei u la ïaksaid bad u la lait phet.
U la ïathuh ruh ba hadien ba u la lait phet, u la wan phai noh sha ïing, hynrei um suk mynsiem shuh namar ba utei u ophisar forest ka Assam u phah thwet ïa u man ka sngi. Kumta u la pyntip noh ha u Acting Syiem ka hima Nongmynsaw bad mynta ka sngi ki dkhot jong ka Executive Dorbar jong ka hima ki la wan sha Nongstoiñ bad ki la leit ban ïakynduh ïa u Deputy Commissioner, ha kaba ki la aiti ha u ïa ka dorkhast halor katei ka jingshah pyndik jong u sordar ka shnong Umbah.
U bah Serbilin Lyngdoh secretary ka hima Nongmynsaw haba ïakren bad ki nongthoh khubor hadien ba ki la mih na kamra treikam u DC, u la ong ba ha katei ka jingleit ïakynduh jong ki u DC u la kular ba un sa ïakren bad ki bor pynïaid District jong ka Kamrup ba kim dei ban pyndik ïa ki nongshong shnong ha khappud, ne ba kin pynthut ïa ka shong suk shong saiñ jong ki paitbah nongshong shnong.
