Ngam jyllop U Samla pule Engineer ka IIM ha Pung Od-Ringai ba ma tam ha ka pyrthei

Mawkyrwat, Lber 13: Uwei u briew uba dei nabar jong ka Jylla Meghalaya mynta ka sngi u hadien ka jingleit kai pyngngad u la ngam jyllop ha kawei ka wah kaba don ha Od-Ringai, Mawten, South West Khasi Hills District.
Katkum ka tyllong khubor napoh ka Fire & Emergency Service, South West Khasi Hills District la ïathuh ba katei ka jingjia ka la jia ha 13 tarik u Lber, 2023 ha ki por kumba 10 baje mynstep ha kaba uwei u briew uba kyrteng u Abishek Roy, 24 snem ei ei uba dei na ka jylla Jharkhand uba pule ïa ka Chemical Engeneering hapoh IIM, Guwahati ula ngam jyllop ha kawei ka wah kaba long Pung kaba don ha Od-Ringai (Natural Swimming Pool) kaba hap hapoh ka Shnong Mawten, South West Khasi Hills District bad kane ka jaka ka jngai kumba 2 kynta duna ei ei haba ïaid da ka kjat.
Kane kadei ka Pung sum ba la pynlong hi da ka mariang, kaba pawnam bha ha ka jylla, ha kaba ki briew na kylleng bad wat kiba nabar ki ju angnud ban leit sha kane ka jaka. Ka pung ka don ha tmier jong ka riat bad dei namar kane ka daw kiba la poi badsum ha katei ka pung ki ong ba kadei ka pung sum ba ma tam ne ka world most dangerpus swimming pool.
Shuh shuh la ïathuh ruh ba utei u samla u la ngam jyllop ha ka pung kaba jylliew kumba 20 phut ei ei bad ïa ka met jong u la ïoh ban sei noh da ka kynhun napoh ka Fire & Emergency Service, South West Khasi Hills District bad ki la ïoh ban sei ha ki por kumba 4 baje ei ei janmiet.
“Kiba la ïa leit lang bad u Abishek Roy ki don kumba 5 ngut ei ei”, la ïathuh.