Shillong, Lber 13 : Ka Pay for Right (PFR) ha ki ar sngi (10 bad 11 tarik Lber) ha ryngkat ka ingïatrei lang bad ka NYK Sangathan Shillong ka la pynlong ïa ki jingïalehkai kaba la tip kum ka District Level Village Cluster Sports Meet.
Hakatei ka sngi ka PFR ka lah pynlong da ki jingpynïalehkai ba bunjait ba kynthup ka jiingïalehkai ïatan tyllai, Mawpoiñ, ka jingpynïamareh 100 meter Race bad ka jingïalehkai Futsal. Ha katei ka lympung ïalehkai la wan ban ïashim bynta da 3 tylli ki Block ha ryngkat bad ka PFR Academy.
Ki Block kiba ïashim bynta ha katei ka lympung ki kynthup ka Mawphlang Block, Laitkroh Block bad ka Mylliem Block.Ha katei ka jingïalehkai, ka Laitkroh ka la khur ïa ka nam jop ha ka Futsal bad ka PFR ka la wan ha kyrdan ba ar.
Ïa ka nam jop ha ka jingïalehkai Mawpoiñ la rah da ka PFR bad ïa ka kyrdan ba ar la rah da ka Mawphlang Block.
Ha ka jingïalehkai ha ka 100 merter Race ïa ka nam jop ba nyngkong la ïoh da u Jerimaiah na ka PFR bad ïa ka khusnam ba ar bad ba lai lah ïoh na Mylliem kata u Johnkupar bad Stambor. Ha ka jingïakob tan tyllai, ïa ka nam jop la ïoh rah da ka Mylliem Block bad ïa ka kyrdan ba ar la ïoh da ka Mawphlang Block. Ha katei ka sngi ka jingïalehkai ka long kaba shongshit bha na ka jingwan ban ai jingkyrshan jong ki paidbah ïa la ki jong ki kynhun. Kane ka long katkum u kyrwoh na u President ka Pay For Right u Samla Franky Kharumnuid.
