Shillong, Rymphang 20 : Ka lympung ïalehkai jong ki skulbah ba la tip kum ka Khelo India University Games (KIUG) 2023 ka la sdang ha kane ka sngi Ba-ar ha skulbah NEHU, Shillong.
Ïa kane ka lympung ïalehkai la wan ban plie da u Myntri ka tnad Ïalehkai ka sorkar jylla, Bah Shakliar Warjri ha ka jingïalang kaba long ha SAI, NEHU Campus Shillong ha ryngkat ka jingdonlang ka Deputy Commissioner ka East Khasi Hills Kong RM Kurbah, nangta u DGP Meghalaya u Dr. LR Bishnoi, Prof. D .K Nayak Acting Vice Chancellor NEHU kynthup naduh ki nongïalehkai bad ki nongpynïaid ïa ki jingïalehkai.
U Myntri haba kren sha ki nongïalehkai ha kane ka sngi, u la ong ba ka sorkar jylla ka la trei ryngkat ryngkat bad ka sorkar pdeng naka bynta ban kyntiew ïa ki kam ïalehkai ha ka Ri. U ong ruh ba ka Khelo India University Games 2023 ka long ban kyntiew ïa ki kam ïalehkai ha ki jylla bad ruh ha ka Ri. “Ka Meghalaya ruh ka pyrshang ban kyntiew ïa ki kam ïalehkai ha ki samla jong ka jylla da kaba pynlong ïa bun ki lympung ïalehkai. Ha kawei ka sngi ngin sa ïohi ba ki samla jongngi kin sa pawnam,” u la ong.
Nalorkata, u ong ruh ba ki samla jong ka Ri ki don bun bha ka sap bad ka talen, kumta u ong ba ha kawei ka sngi, kin sa don ki nongïalehkai kiba aireng ha kum kine ki lympung kiban ïoh mihkhmat pat ïa ka jylla bad ruh ïa ka ri ha ki lympung kiba heh.
U Myntri u la pyntip ruh ba ki la don kumba 33 tylli ki skulbah kiba shim bynta ha katei ka Games kaba long ha ka jylla.
Na ka liang u Myntri ka tnad Ïalehkai ka sorkar pdeng, u Anurag Thakur haba kren ha ka jingïalang plie pyrda ha ka sngi Nyngkong ha nongbah Guwahati u la ong ba katei ka lympung kan plie lad ïa kum ba 4,544 ngut ki samla pule na kylleng ki skulbah jong ka Ri ban mih madan bad ïakhun ha ki 18 tylli ki jaka bapher bapher jong ki jylla ka thaiñ shatei-lammihngi jong ka Ri, kata ha Assam, Arunachal Pradesh, Meghalaya, Mizoram, Sikkim, Nagaland bad ha Tripura.
Shuh shuh u ong ruh ba ha kane ka lympung ki la don haduh 20 tylli ki jait jingïalehkai kynthup naduh ki athletics, rugby, swimming, badminton, hockey, football, lem bad kiwei kiwei. U la pyntip ruh ba kum shi bynta ban kyntiew ïa ka Fit India, ka sorkarka la kynthup lang ruh ïa ka yoga bad ki jingïalehkai tynrai.
