Jowai, Nohprah 03: Ka Skill India Digital (DPI) hapoh ka Digital Platform Infrastructure (DPI) shi bynta naka rukom treikam ka sorkar pyrdi ban pynshlur ïa ki khynnah ban ïeng hala ki jong ki kjat ban seng ïa ki kam la jong hapoh ka ri.
Ha kane ka 29 tarik la sdang ïa ka Skill Hub ha JNV PM SHRI School Jawahar Navodaya Vidyalaya, Mukhla, West Jaiñtia Hills ha kane ka sngi u ma S.K. Lato ula long kum u kongsan.
La pynsngew ba ka thong jong kane ka Skill Hub ka long ban ai jinghikai ïa ki khynnah ban ïeng ha ki kjat la jong, ha ka juh ka por yn ai jingkyrshan ïa ki katkum ki kyndon hapoh ka National Education Policy (NEP) 2020 lyngba ka Pradhan Mantri Kaushal Vikas Yojana (PMKVY) 4.0 khamtam ïa kito ki skul kiba ïadei bad ka CBSE lada dei jong ki kynhun shimet ne jong ka sorkar.
Shuh shuh ki Skill Hub katkum ki kyndon treikam ki dei ban ai jinghikai sha ki khynnah hadien bala kut ka por long skul ne ki sngi shuti. Hapoh ka NEP 2020 kan ai jinghikai ruh ïa ki khynnah kiba don la ka jong ka sap ban seng ïa ki kam la jong ki ban ïoh 50% ka jingshah hikai haduh u 2025 naka bynta ki khynnah pule lass 9 haduh 12 bad kumjuh ïa ki khynnah kiba la pep skul.
Ha kane ka jingïalang ban sdang ïa ka Skill Hub la wan ïashim bynta da ki khynnah skul jong ka JNV Mukhla bad ki khynnah ka Kiang Nangbah Government College. Ha kane ka Skill Hub yn pdiang ïa ki khynnah ban shah hikai haduh 60 ngut, na ka bynta ki khynnah JNV Mukhla 40 ngut bad 20 ngut na kiwei pat ki skul kiba don hapoh ka District.
