K a jingioh kem ki pulit ka jylla ïa kiba bun ki nongkhaïi drok ha kine ki khyndiat sngi bad ka jingïoh kurup ïa uba bun bah ki drok ka long kaei kaei kaba pyndiaw, pynsngewsih bad pynsngewkhia mynsiem shibun ïa ki kmie ki kpa bad ïa ki paidbah ruh baroh. Ym pat ju don ka jingïoh kurup droks kaba jur haduh katne katne ha ka jylla,wat lada ki Pulit ki ju ïoh kurup drok ha ki por kiba la leit ruh.
Kane ka jingbun ka jingïoh kem droks ka pyni ba kiba dih ruh ki la bun bha, namar lada ym don ki nongdih, kumno pat ki nongkhaïi kin bun. Kane kadei ka por ba ka imlang sahlang, ki kmie ki kpa, ki bor shnong, ki Balang haduh ki bor sorkar kidei ban shong pyrkhat khia bha ïa kane ka kam, namar ka don ka jingima kaba jur haduh katta katta.
Ki Pulit kiba ïohkem ïa ki nongkhaïi droks, kim dei ban kut tang ha ka jingpynshitom katkum ka aiñ, hynrei ki dei ban pynïar ïa ka jingtreikam jong ki da kaba thaw ki lynti kumno ban ïasyllok bad ki briew kiba donkti ha kane ka kam.
Kawei na ki lad kiba donkam bha ban leh, ka long ka jingïasyllok nyngkong eh ha ïing hasem, ha kaba ki kmie ki kpa kin hap shim ka jingkitkhlieh kaba khraw bha halor kane, namar ba ka por kaba bun eh kaba ki khun ki kti ki pyllut por ka dei bad ki kmie ki kpa. Ki kmie ki kpa kidei ban don ka por kaba kylluid na ka bynta ki khun,khamtam haba ki la sdang ban khie samla bad sdang ban ïa ïaid paralok bad kiba bun. Kane kadei ka por kaba ki khun ki ngat ruh ha kiba bun ki jingpynshoi na ki paralok bad ka dei ruh ka por ba ki dang shongshit bad kwah ban mad ïa kiei kiei kiba pynsngewtynnad ïa ka jingim jong ki. Kane kadei ruh ka por kaba ki kmie ki kpa kin hap ban ïalong paralok bad ki khun khnang ba kan wanrah ka jingïajan.Ka jingpoi kiba bun ki samla sha ka jingdih droks ka dei namar ba ki kmie ki kpa kim don por ban ïashongkai ne ban ïakren ïakhana bad ki.
Kine ruh ki dei ki sngi ha kaba ki samla ki don hapdeng ka jinglynga bad ka jingpisa kaba jur ha ka jingïaid lynti jong ki.Ka jingbym ïohkam ïohjam, ka jingbym don ki opportunities ha ka jingim jong ki.Kiba bun ki samla kiba don jingkyrmen ban ïoh ka kam ka jam kaba biang hadien ba ki la dep ka jingpule, ki ngat ha ka jingdih droks, namar ka jingangnud bad ka jingkhmih lynti jong ki kam poi shano shano ruh. Ka rukom thungkam thungjam ha kine ki sngi ba mynta ka ïaid da ka lynti kaba kynriang, kiba dei hok ban ïoh kim ïoh bad ki bym dei hok ban ïoh ki ïoh. Dei ha kaba kum kane ka khep ba ki samla ki duh jingkyrmen bad ki phai sha u Droks.
Nalor ki kmie ki kpa, ki bor shnong, ki bor Balang ruh kin hap ban shimlang ka jingkitkhlieh na ka bynta ki samla.Ki bor shnong kin hap ban pyrkhing bad long phikir bha ïa ka ïaid ka ïeng bad ka rung ka mih ki samla hapoh shnong. Kam kut tang ha kaba buh ki adong ba ym bit ban shongmiet ha ki surok, ym bit ban shongkai ha ki jaka ba dum bad kumta ter ter.Hynrei donkam ban don ka jingpeitngor shisien ba ïohi ïa ka jingpher ha ka ïaid ka ïeng jong ki samla.
Ki bor Balang lei lei ki don ka bynta kaba kongsan bha, namar ka jingsdang dih droks ka mih na ka jingpyrkhat ba bakla jong ki samla. Ki bor Balang ki don ka bor ha kaba ïasyllok ne ka Counselling ïa kiba bun ki samla kiba don hapoh ka Balang. Dei ban don ki topic halor ka jingsniew jong u droks ha ki lynnong Skul pynpaw ne ki Sunday School, khnang ban lah ban pynsngewthuh ïa ki.
Nangta ki skul ki kolej, kidei ban don ka jingpeit kaba jan bha ïa ki khynnah skul ne kolej, namar kaba bun ka por ki don ha ki jaka pule. Ki bor skul kim dei ban riej ne sheptieng ban pyntip sha ki bor ka aiñ haba ki don ka jingsuba ïa ki samla kiba kum kine.
La ïohi ba kiba bun ki Awareness Programme lapynlong halor ka jingsniew jong u droks bad kaei kaba la ïohi ba ha kiba bun ki prokram kiba kum kine, la pynlong ryngkat bad ki Concert ki jingshad jingbatai bad ter ter. Kaei kaba la ïohi ka long ba kane kam shym la ïarap satia.Lehse ka por ka la dei ban pynkylla noh ïa ka rukom ïalap halor ka jingsniew ki droks.
