Nongpoh, Nohprah 03: Kum uwei na u rangïalehkai phutbol ba paw jong ka ri na ka jylla Meghalaya, u Bah Eugeneson Lyngdoh ha ka sngi Saitjaiñ kum u kongsan u la wan ban plie paidbah noh ïa kawei ka shlem ai jinghikai ba la tip kum ka Ri Bhoi Football Coaching Centre kaba don ha ka shnong Pahamsyiem, ha kaba lyngba katei ka shlem kiba bun ki samla don sap ha ka jingïalehkai phutbol kin sa ioh jingmyntoi ban pypaw ïa la ki sap ki phong ba ki don ha ka jingïalehkai phutbol.
Ha kane ka sngi la don ryngkat lang ruh u MLA ka Nongpoh, u Bah Mayral Born Syiem kum u symbut kongsan bad la sakhi lang ruh da ka jingdon lang u President ka RBDSA, u Bah R.B Shadap, u Bah Wanphrang Sumar, Assistant rangbah shnong ka Pahamsyiem bad kiwei kiwei kiwei ki riew rangbah.
Kane ka Ri Bhoi Football Coaching Centre ka la urlong ban ai jingmyntoi ïa ki khun samla ka dei lyngba ka jingïatrei lang ka El Elyion Institute bad ka Nangkyrsiewthiah Player Youth Club, ha kaba da kawei ka jingmut ki la seng ïa kane ka shlem ai jinghikai kum kawei na ka thong ban pyntbit ïa ki samla don sap ha ka kam ïalehkai phutbol.
Lyngba jong kane ka sngi, la pynlong ruh ïa ka jingpyni ïa ki sap ki phong ki khynnah kiba la ioh jinghikai halor ka buit ïalehkai phutbol kumba la ai jinghikai ha kane ka shlem ba la shim bynta da ki heprit na kylleng ka thaiñ Nongpoh, kiba la wan ban shah hikai ne shah pyntbit ha ka jingïalehkai phutbol lyngba kane ka shlem ai jinghikai.
Haba ai jingkren ha kane ka sngi, naduh u Bah Eugeneson Lyngdoh kum u khlur ïalehkai phutbol ba rim na ka jylla bad ka ri bad kumjuh ruh u MLA ka Nongpoh, u Bah Mayral Born Syiem, ki la ai ka jingïaroh ïa kito kiba la don kti ban wan rah ïa kane ka shlem ai jinghikai, namar ha kine ki sngi kiba bun ki khynnah don sap kim ioh lad ban pypaw ïa ka sap kaba ki don, hynrei lyngba ka jingdon kum kine ki shlem ai jinghikai kan long ka jingmyntoi ïa kiba bun ki samla don sap ha ka kam ïalehkai phutbol.
Shuh shuh, ki la kyntu ruh ïa ki bor pynïaid jong kane ka shlem ai jinghikai ba kin dang pyndonkam hok ban ai kata ka jinghikai kaba paka ïa ki khynnah, namar ngim lah ban tip kan poi ka por ba na kane ka shlem ruh kin sa mih shibun ki khlur ïalehkai kiba paw ha ka jingïalehkai phutbol kaba long ka burom ym tang ïa ka District bad ka jylla bad ka burom ka long ïa ka ri hi baroh kawei, ki la bynrap.
