Shillong, Nohprah 03: Ka kynhun ïalehkai Basketball ki thei ka jylla hapoh ka lama jong ka Meghalaya Basketball Association kiba leit ïashimbynta sha ka ’73rd Senior National Basketball Championship’ ki la ïoh ban khur namjop ha ka sngi sdang ïakhun hynne ka Sngi U Blei pyrshah ïa ka Assam, katba ka kynhun ki shynrang ka la shah rem ha ka Haryana.
Kumban shu pynkynmaw, ka jylla kaba la phah ïa baroh ar kynhun, Shynrang & Kynthei sha katei ka lympung kaba la plie pyrda hynnin ka Sngi ha Ludhiana (Punjab) ka ban kut haduh ka 10 tarik Nohprah bad ïa kane ka Championship la pynlong hapoh ka jingpynïaid jong ka Basketball Federation of India.
Na ka liang jong ki nongpynïaid ki la bynta ïa ki kynhun haduh hynriew tylli ki thup (kata naduh Group-A haduh Group-F) ïa baroh ar Shynrang bad kynthei. Na ka thup kynhun Shynrang la bynta mar hynriew tylli kynhun lait noh ka Group A & B kiba don tang san kynhun, katba ha ka thup kynhun ki Kynthei la phiah mar san tylli.
Ka kynhun ki shynrang ba mihkhmat ïa ka jylla ha kane ka lympung ki la ngat hapoh ka thup jong ka Group-C, bad ki kynhun kiba don ryngkat ki long ka Andamon & Nicobar, Goa, Haryana, Mizoram bad ka West Bengal. Ka kynhun ïalehkai ki shynrang ka la ïakynduh nyngkong pyrshah ïa ka Haryana ha kaba ka la shah rem da 106-66 point ha ka jingïakhun kaba la long ha ka por 8 baje mynstep.
Haba phai pat sha ka kynhun ki thei ka jylla kiba shah pynhap ha ka thup jong ka Group-E, ki la ïoh ban sdang ïa ka lympung da ka namjop hadien ba pynliem ïa ki thei ka Assam da 53-25 point ha ka jingïalehkai kaba la long ha ka por 9:30 baje mynstep. Ki jylla kiba haplang ha kajuh ka thup ryngkat bad ka Meghalaya (Kynthei) ki long ka Assam, Goa, Jharkhand bad ka Telanggana.
Na ka liang jong ki shynrang kin sa hap ban aireng sa ïa ka Mizoram mynta ka sngi ha ka por 9 baje mynstep na ka thup jong ka Group-C, katba ki kynthei kin aireng sa ïa ka Jharkhand ha ka por 4 baje janmiet.
