Khliehriat nohprah 03: Ka Meghalaya People’s United Front East Jaiñtia Hills District, ka la buh da ka jingthoh hakhmat u Superintendent of Police East Jaiñtia Hills District, u Jagpal Singh Dhanoa, IPS ha kaba ka seng ka la kyntu ïa u Superintendent of Police ban shim khia ban phah peit bad bishar bniah bha bad ban talasi ïa ki kali ioh don kiba ñiah kali khlem da don ki license ñiah kali.
Ha ka shithi ba la soi da u President jong ka MPUF – EJHD, u bah Kyrshan Blah, u la kyntu ïa ki bor pulit ba lada lap ïa kito kiba ñiah kali khlem license dei ban pynshitom ïa ki katkum ki kyndon aiñ bad kane kan long ruh naduh kito kiba ñiah ia ki kali rit kumjuh ki kali ar shaka.
U bah Kyrshan Blah u la ong ruh ba donkam shisha ban don ïa ka license ka ba biang ïa kiba ñiah kali,namar “Haba ngi leit sha kawei ka District ngi hap ban pynbiang ïa ki kot ki sla, te balei pat ha District jong ngi ngim shem lah ban leh bad pynbiang”. La ong ba na ka liang u SP ruh u la kular ba un sa shim khia ïa katei kam namar ka long ka ba donkam shisha ban pynbiang ïa ki kot ki sla khamtam ka license khnang ba nym don kano kano ka jingeh hadien habud.
