Shillong, ïaïong 20: Ka kynhun ïalehkai jong ka Meghalaya ka la pynliem ïa ka Mizoram da 47 ron ha ka jingïalehkai ba nyngkong jong ka lympung 1st North East Little Master’s Trophy 2025 ha Guwahati ha ka sngi U Blei.
Ka Meghalaya ka don ha ka Group A ryngkat ka Assam ka Jylla kaba pynlong ïa ki jingïalehkai, nangta ka Mizoram bad ka Arunachal Pradesh. Ka Tripura, Manipur, Nagaland bad Sikkim ki don ha ka Group B. ïa kane ka lympung na ka bynta ki khynnah shynrang ba hapoh 14 snem (U-14) la pynïaid da ka Assam Cricket Association.
Haba phai sha ka jingïalehkai, ka Mizoram ka la jop ïa ka jingkynting pisa (toss) bad la ailad ïa ka Meghalaya ba kan tied nyngkong ha kane ka jingïakhun kaba 40 ober. Ka Meghalaya ka la khyllem lut baroh ki wiket na bynta 145 ron naki 34.3 ober ïa kaba ka Mizoram ka la lah ban jubab tang 98/10 naki 27.5.
Kaba la noh synñiang shibun ïa ka Meghalaya dei lyngba ki Extra, ha kaba ka Mizoram ka la pynsepei da kaba ai haduh 44 tylli ki wide bol. U Sahil R Marak u la kamai 29 naki 37 bol, katba u Jagrit Thakur u la lah ban kamai 20 ron naki 28 bol. U Isac Zomuanpuia (khur 5/23 naki 8 overs) bad u K Lalramthara (khur 4/35 naki 6.3) ki long ki rangkawang bol kiba seisoh jong ka Mizoram.
Ka inning kaba ar ka la sdang bha ha kaba u Calvin Syngkli u la ïoh ban shim wiket mar ïa kawang ïa bol kaba nyngkong. San wiket na ki hynñiew ngut ki nongtied ba nyngkong jong ka Mizoram ki la hap khlem da ïoh kamai ron ha kaba ka Meghalaya ka la pynkordit da kaba ailad tang 29 ron na bynta 6 wiket. Hynrei katto katne ka jingïakhun ba kham dier, khamtam eh da u Austin Vanlalvenpuia (28 ron na ki 28 tylli ki bol), ka la pynslem ïa ka jingïakhun kaba ym lah ban kiar, watla katta ruh ka Meghalaya ka la lah ban pynkhyllem lut ïa baroh ki nongtied ka liang pyrshah tang hapoh 100 ron.
U Sahil u la leh bha ha ka bol kumba u la leh bha ha ka tied, da kaba khur 4/20 naki 4.5 ober. u Janggo K Marak u la khur 2/8 naki 3 bad ki la don ruh ki wiket ba la khur da u Ashwin Shah (1/8 naki 3), Abhinav Khanal (1/7 naki 7), u Calvin (1/16 naki 4) bad Aditya Singh (1/25 naki 5).
