Mawkyrwat, Ïaïong 20: Da ka mynsiem jong ka jingieit, sngewburom bad kum ka dak jong ka jingpynshlur na ka bynta ki khynnah skul, ka Seven Sisters Higher Secondary School, Mawmitbah kaba don hapoh Mawkyrwat Block, South West Khasi Hills District ka la ïoh ban pynkup burom ïa u samla Kevin Lyngdoh Sangriang uwei na ki nongïakop ñiah saikil.
Ka jingpynkup burom jong ka Seven Sisters Higher Secondary School, Mawmitbah ïa u samla Kevin Lyngdoh Sangriang uba dei ruh ha kajuh ka por u khynnah ba pule ha kane ka skul, ka long ba ula wanrah ka nam ka burom ïa ka skul, ka shnong ka thaw, ka dong ka thaiñ, ka distrik bad ka jylla Meghalaya baroh kawei ha kaba ula khur ar tylli ki takma ksiar (Gold Medals) ha ka 21st National MTB (Mountain Bikes) Cycling Championship ba la dep pynlong ha Haryana naduh ka 28 tarik u Lber, 2025 haduh 1 tarik u Ïaïong, 2025.
Ha kane ka sngi jong ka jingpynkup burom la ïoh jingkren ryngkat ki jingaimynsiem na u bah Pherlyne Lyngdoh, Secretary jong ka Shnong Mawmitbah, u bah Ambruse Thongni uba dei u President ka Mawkyrwat District Cycling Association (MDCA), kong Daiasuk Ïawphniaw, Assistant Headmistress bad kumjuh ruh na ki kmie kpa jong u samla Kevin Lyngdoh Sangriang ha kaba na ka liang jong ki ki la ai mynsiem ïa u ba haba u la ïoh kheit ïa u soh jong ka jingjop ha kane ka jingïakop ka 21st National MTB (Mountain Bikes) Cycling Championship ka la long shisha ka jingsarong ym tang ïa u shimet hynrei ïa ka ïing ka sem, ka shnong ka thaw, ka dong ka thaiñ, ka district bad ka jylla Meghalaya baroh kawei namar kham ñiar eh ban ïoh sngew ba ka jingïoh ar tylli ki takma ksiar ha ka jingleit ïa kop kaba dei ha ka sien ba nyngkong.
Kumta, ki la ai mynsiem ïa u ba haba u la ïoh kum kane ka jingjop, ym dei ban don ka jingsngewsarong hynrei ki dei ban don beit ïa ka dohnud jong ka jingsngewrit ha ryngkat ka jingtrei shitom ha ki por baroh bad kumjuh ban long kiba kohnguh bad burom ruh ïa ki kmie ki kpa, ki nonghikai bad ïa kaba la heh la san khnang ba ka lawei jong u kan nang ïai phyrnai.
Ha kajuh ka por ki pynkynmaw ruh da kaba ong ba nalor ka kam ïalehkai ñiah saikil, um dei ruh ban klet ne kheiñ stieng noh ïa ka pule puthi namar ka jingnang jingstad ryngkat ka kam ïalehkai ka dei ban ïaid ryngkat ryngkat.