Mawkyrwat, Ïaïong 19: Ka Kuchaphrang Football Club bad ka Mawlangwir Sports Club ki la ïoh ban rung sha ka phainal jong ka lympung ïalehkai phutbol ba la tip kum ka 1st Division Football League 2025 ba la pynïaid da ka Mawkyrwat District Sports Association ha madan Artificial Turf, MDSA, Nonglang, South West Khasi Hills District.
Lah ban kdew ba ka jingïoh rung jong ka Kuchaphrang FC sha ka phainal ka dei hadien ba ka la jop pyrshah ïa ka Marshilong Sports Club da 4-3 kol lyngba ka Tie Breaker ha ka jingïakhun ïa ka semi final.
Kumjuh ka Mawlangwir Sports Club ka la ïoh rung sha ka phainal ka dei hadien ba ka la pynliem noh ïa ka Snapkirang Football Club da 4 – 2 kol lyngba ka Tie Breaker ha ka jingïalehkai semi final hadien ba ki la ïakhaid mar shi kol ha ka por ba la buh.
Kumta ka jingïakhun phainal hapdeng ka Kuchaphrang Football Club bad ka Mawlangwir Sports Club kan long mynta ka sngi, ka 21 tarik u Ïaïong, 2025 ha ka por 2 baje nohphai sngi ha madan Artificial Turf, MDSA, Nonglang, South West Khasi Hills District.
