Jop suk ka Shillong CA da 168 ron ïa ka Jaiñtia Hills Districts CA

Jowai, Ïaïong 19: Ka Shillong Cricket Association-B kala jop suk da 168 ron ïa ka East Jaiñtia Hills Districts CA, ha kawei na ki jingïalehkai jong ka lympung Under-16 Boys Inter District Cricket Tournament 2025 (Zone-1) kaba la long ha ka sngi saitjaiñ (19 tarik ïaïong, 2025).
Ïa kane ka lympung la pynlong daka Meghalaya Cricket Association [MCA] ïa kaba la pynïaid daka West Jaiñtia Hills District Cricket Association (WJDCA) ha Madan Thad, Mukhla Mission,West Jaiñtia Hills District.
Haba phai sha ka jingïalehkai kaba saw hapdeng ka SCA-B pyrshah ïaka East Jaiñtia Hills Districts CA. Ïa ka jingkynting pisa (toss) la jop daka SCA-B kaba kam trai ban tied shuwa bad ka la lah ban kamai 239 ron shuwa ban khyllem lut baroh 10 wiket haka 35.5 overs.
U Prasant Kumar ula lamkhmat ha ka tied da kaba kamai 64 run marwei na ki 60 balls katba u Mannan Surana ula noh synñiang 57 ron na ki 41 bol. U Generous Dkhar, Nongkawang ball jong ka East Jaiñtia Hills Districts CA u la ïoh khur 4 wiket na ki 10 ober.
Namar ka jingpynthut u slap ïa ka thong (target) la hap ban pynduna sha ka 221 runs na ki 42 over katkum ka DLS method. Hynrei haba beh ïa katei ka thong ka East Jaiñtia Hills Districts CA ka la lah ban kamai tang 52 ron bad ka la liem lyndang baroh 10 wiket haka 23.5 overs bad kane ka la pynlong ïa ka SCA-B ban jop kput da 168 ron.
Ïa ka Nam man of the Match la ïoh khur da u Arav Baraily, u kapten jong ka SCA-B uba la ïoh khur 6 wiket ha ka boling bad kamai 19 ron ha ka por tied.
Ka jingïalehkai mynta ka sngi Nyngkong (21/04/2025) kan long hapdeng ka Ribhoi District CA pyrshah ïa ka Eastern West Khasi Hills DCA naduh ka por 8 shiteng mynstep.