Jowai, Ïaïong 19: Ka Youth Development Committee (YDC) jong ka East Jaiñtia Hills District Football Association (EJHDFA) ha ryngkat ka jingïatreilang bad ka District Sports Promotion Society ha ka sngi Saitjaiñ (19 tarik ïaïong, 2025) kila sdang ïa ka Baby League 2025 ha kaba la don haduh saw tylli ki jingïakhun ar tylli haka kyrdan U-11 bad ar tylli haka U-9.
Ha kane ka sngi sdang la wan ban sakhi lang ïa ka jingïalehkai da u Chairman ka Youth Development Committee ma Chawas Nongtdu, u Waheh Shnong Diengshynrum ma Wilbert Nongtdu, ki dkhot Committee ka YDC EJHDFA lem bad ki kmie ki kpa jong ki khynnah.
Ka jingïakhun ha ka U-11 kaba la long hapdeng ka Khliehriat GR Eagles pyrshah ïa ka Rymbai GR Hawks kila poi sha ka jingïakhaid da mar shikol 1-1. Katba ka Wapung Tiger SC kala jop da 2-1 kol ïaka Golden Lion FC.
Ha ka U-9 ka Khliehriat GR Eagles kala jop da 2-0 kol ïa ka Rymbai GR Hawks. Katba ka Golden Lion FC kala jop da 3-0 kol ïa ka Wapung Tiger SC.
Na ka bynta kine ki saw tylli ki team haka kyrdan U-11 bad U-9 kiba wan ban ïashim bynta la leh da ka register haduh 20 ngut ki khynnah ha kawei ka team kynthup ïaki kynthei bad shynrang. Katba ha U-7 ki kynnah rit kim donkam la leh registration. La ïoh jingkhieñ baroh ki khynnah kiba wan sha kane lympung ‘Baby League’ ki don palat ïa ka shi spah ngut.
