SHILLONG, Jylliew 29: Ka Meghalaya Athletics Association [MAA] ka la ïoh ban pynlong ïa ka jingpyrshang jied nongïalehkai kaba nyngkong lane ka 1st Selection Trial na ka bynta ban pynkhreh ïa ka 39th National Games ha ka sngi Saitjaiñ (28 tarik, Jylliew).
Ka jingpynlong ïa kane ka Trial ka long ban jied ïa ki nongïalehkai kiba kynsai ha ka Athletic ki ban mihkhmat ïa ka jylla ha ka National Games.
ïa kane ka Trial kaba nyngkong la pynlong na ka bynta ki shynrang bad kynthei kiba na West bad East Jaintia District ha Wahiajer Stadium.
Ka Selection trial ha Shillong kan long ha ka 05 tarik Naitung, 2025 na ka bynta ka East, West, South West Khasi Hills bad Ribhoi District yn pynlong ha Sai Center Nehu.
Katkum ka jingkheiñ, ki nongïalehkai kiba la wan ban pyrshang ïalade sha kane ka prokram jied na ka bynta ka West bad East Jaintia District, ka la kot sha ka 139 ngut, ba kynthup ïa 27 ngut ki kynthei bad 112 ngut ki shynrang, ryngkat bad 15 ki nongïalehkai kiba la shemphang (Senior athlete) ban khmih bñiah ïa ka jingpyrshang.
Kane ka Selection trial ka long na bynta lai tylli ki jingïakop, ka Running Event, ka Jumping Event bad ka Throwing Event.
Ka Running Event ka kynthup ïa ka jingïakop mareh kaba 100m, 200m, 400m, 800m, 1500m, 5000m bad 10000m, ka Jumping Event ka kynthup ïa ka Long Jump, High Jump bad ka Triple Jump, bad ka Throwing Event ka kynthup ïa ka Shot Put, Discuss throw bad ka Javelin throw.
Ban shu pynkynmaw, ki la 800 ngut ki nongïalehkai shynrang bad kynthei (athlete) kiba la thep kyrteng na ka bynta kane ka Selection Trial, ha kaba 140 ki dei na Jaintia Hills, 308 ngut na Khasi Hills bad 352 na Garo Hills.
