Nongstoiñ, Ïaiong 09: Ka lympung ïalehkai sports ba la tip ka kum Lower Primay School Sports Meet Nongstoiñ Town kaba lai sngi, ka la sdang mynta ka sngi 9 tarik Ïaiong 2025 ha madan NDSA Nongpyndeng Nongstoiñ, West Khasi Hills.
Kane ka lympung ka dei kaba shiphew naduh ba la sdang ïa ka bad ha kane ka lympung ba mynta u snem, ki la don kumba 18 tylli ki skul bapher bapher ka thaiñ Nongstoiñ kiba la ïashimbynta shitrhem.
Ha ka sngi plie pyrda ïa ka lympung, la don ryngkat ban ai mynsiem da I District Sports Officer kong Balarina Syiem kum I kongsan ha ryngkat ka jingdonlang kiwei de ki kynrem ki lyndan, kynthup ruh ïa ki nongkitkam jong ka L.P School Sports Meet Nongstoiñ Town, kata naduh u President Babu K.K Lynser, u symbud kongsan Bah Sahit Diengngan na ka HDFC Bank, ki Official jong ka lympung, ki nonghikai skul bad kiwei kiwei.
La pynphuh pynphieng ïa kane ka sngi sdang da ki jingrwai jingshad bad kiwei kiwei ki program bad ka la long shisha kaba shongkun bad ai mynsiem. Na ka liang I kongsan I la kyntiew ïa ka lama jong ka Synjuk bad shim ruh ïa ka salute ïa ka March Pass jong ki 16 tylli ki skul kiba shim bynta.
Na ka liang I Kongsan haba ai jingkren I la kitbok kit rwiang ïa ki nongïalam jong ka L.P School Sports Meet Nongstoiñ Town, ba kin ïaid shaphrang bad pyntyllun ïa ka kam ban kyntiew ïa ka sap ka phong ïalehkai jong ki hep barit.
I la ai mynsiem bad kitbok ruh sha baroh ki skul kiba shim bynta bad kyrpang ruh ïa ki khynnah, da kaba ong ruh ba donkam ban bate ïa ka por la ka long ha ki kam ïalehkai, kiba ai ïa ka met kaba khiah krat bad kumjuh ruh ban pynleit jingmut ha ki lynnong kot.
Kane ka lympung kan bteng biang ha ka 10 tarik bad ha ka 11 tarik yn pynkut ha kaba u Bah B.Lyngkhoi Chief Engineer, CEA Ministry of Power & Officio Additional Secretary to the Government of India un long u kongsan ban pynkut ïa ka lympung.
