2nd NECDC Senior Women’s T20: Pynliem ka Meghalaya ïa ka Nagaland, yn aireng pyrshah ïa ka Manipur ha ka semi

Shillong, ïaïong 09: Ka Meghalaya ka la pyndep hakhlieh duh na ka Group A hadien ka jingjop da 29-ron pyrshah ïa ka Nagaland ha ka lympung ïalehkai 2nd NECDC Senior Women Tournament 2025 ha Rangpo, Sikkim, hynne ka sngi Balang.
Sa shi sien ka Debasmita Dutta ka la tyngshaiñ biang da ka jinglah jong ka ban kamai 68 ron na ki 65 tylli ki bol hadien ba ka Meghalaya ka la shah pyntied nyngkong hadien ba rem ha ka jingkynting pisa (toss). Ka Meghalaya ka la kamai 122/4 na ki 20 ober, hynrei ka Nagaland ka la lah ban jubab tang da 93/9.
Hadien ba ka la pynliem ïa ka Mizoram hynnin ka sngi Hatmajai, ka Meghalaya ka la pyndep hakhmat na ka Group A da kaba jop arsien ha ki ar tylli ki jingïalehkai. Ka Nagaland kaba la pynliem ïa ka Mizoram ha ka sngi sdang ka la wan ba-ar. Kine ki arliang mamla kiba wan hakhmat kin jam shakhmat sha ka semifinal jong kane ka lympung, ba la pynïaid da ka North East Cricket Development Council bad kaba la pynlong da ka Sikkim Cricket Association.
Ka Debasmita ka la khyrwit ïa 10 tylli ki saw ron (fours) ban kynjoh mar shiteng ïa ka spah ron, katba ka Neha Hajong (20 ron naki 21 bol) bad ka jingnoh synñiang kaba kham hadien na ka Ajima Sangma (15 ron not out naki 7 bol) ka la ïarap ïa ka Meghalaya ban buh ïa ka thong kaba shongkhia. Ka Debasmita ka la jan ïaineh haduh ba kut jong ka Innings hynrei ka la shah pynkhyllem noh ha ka ober kaba khatduh.
Haba jubab, ka Nagaland ka la shah khanglad noh tang 93 ron na ka bynta 9 wiket. Ki arngut ki nongtied ba nyngkong ki la shah pynkhyllem noh ha kaba sdang jong ka over kaba lai, ha kaba ka Ajima ka la ïoh jingïaroh na bynta baroh ar, kawei lyngba ka run out bad kawei pat ka la shah stump noh ha ka wicketkeeper ka Monica L Phawa. Ka Ajima (khur 1/9 ha ki 3 over) ka la don bynta ruh ban pynhap ïa kawei ka nongtied lyngba ka run out.
Ka Monica Singh ka la lamkhmat ha ka bowling da kaba khur 2/13 ha ki 4 ober, katba kiwei pat kiba ïoh ban khur wiket ki long ka Indariakor K Wanniang (1/12 na ki 2 ober), ka Rubi Chettri (1/13 na ki 4 ober) bad ka Neha (1/15 na ki 2 ober).
Ka Debasmita ka la shah jied kum ka nongïalehkai ba kynsai tam ‘Player of the Match’, kaba dei ka khusnam kaba ar sien lynter ïa ka. Ka la ïoh pdiang ïa ka takma na u President ka Sikkim Cricket Association u Tika Subba.
Ka Meghalaya kan aireng pyrshah ïa ka Manipur ha ka semifinal kaba nyngkong mynta ka Sngi Palei. Ka Sikkim kan ïakynduh pyrshah ïa ka Nagaland ha kawei pat ka semi final.