ïoh jingithuh ka Meghalaya ha ka jingïalang sam khusnam jong ka NE Cricket Development Council

Shillong, ïaïong 08: Ka North East Cricket Development Council ka la pynlong ïa ka jingïalang sam khusnam kaba saw kaba la tip da ka 4th Achiever’s Night ha Chintan Hall, Gangtok, Sikkim ha ka sngi U Blei.
Ka NECDC, kaba dei ka kynhun pynïaid jong ki hynriew tylli ki jylla jong ka thaiñ Shatei Lam Mihngi (North East state), ka la pynkup burom ïa ki nongïalehkai kriket shynrang bad kynthei kiba la tyngshaiñ ha ki jingïalehkai ha baroh ki rukom jingïalehkai (format) ha ka samoi ïalehkai jong ka BCCI kaba dang shu kut shen.
U Myntri Rangbah ba donburom jong ka Sikkim u Prem Singh Tamang, u la long u kongsan katba u Lamphang ka Ïing Dorbar Thawaiñ ka Sikkim u Mingma Norbu Sherpa u la long u symbud kongsan. Kiba la ïadon ryngkatlang ha kane ka jingïalang ki kynthup ïa ki myntri sorkar jong ka Sikkim.
Nalor kiwei pat ki khusnam shimet la sam ruh ïa ka khusnam kyrpang ïa ka Meghalaya Cricket Association [MCA] kum ka jingithuh ïa ka jingïa shim bynta jong ka ha ka lympung ïalehkai Elite Group ha ka samoi ïalehkai BCCI 2024-25.
Kiwei pat kiba la donlang ha katei ka sngi ki long u MKJ Mazumdar uba dei u dkhot ka Apex Council jong ka BCCI; u Naba Bhattacharjee – President ka MCA bad Co-Convenor ka NECDC; bad T Subba, President jong ka Sikkim Cricket Association. La ai pynkup burom ïa ki President bad ki Honorary Secretary jong baroh 6 tylli ki synjuk ïalehkai kriket da u kongsan bad ka MCA ka la ai khublei ruh ïa u Shri Tamang da ki riam bad ki jingai sngewbha tynrai jong ki Khasi bad Garo.
Ka jingïalang kaba shiphew jong ka NECDC, kaba la pynïaid da u Bhattacharjee, la pynlong hadien ka jingsam khusnam ban pynbiang ïa ki kyndon jong ka jingïatreilang hapdeng kine ki hynriew tylli ki jylla nalor ban pynkhreh ïa ka kalendar jong ki jingïalang bad ki bilateral series hapdeng ki jylla.