Nongpoh, Lber 24: Shibynta ka jingsdang jong tamasa Strawberry Festival bala pynlong da ka kynhun ki samla bala tip kum ka Young Minds Association, ka Motor Sports Association of Meghalaya haka jingïatreilang bad katei ka kynhun mynta ka sngi kala pynlong ïaka jingïakop pynher kali bala tip kum ka 4th Maximum Attack Challenge ha madan Kurkalang, Lumdaitkhla Bhoirymbong ban pynkut lashai ka sngi.
Ha katei ka jingïakop pynher kali, ki nongñiah kali kiba ju sngewtynnad ban ñiah haki surok khohruh khohram kila wan ban shim bynta shitrhem na kylleng ki jaka jong ka jylla bad wat nabar ka jylla kum ka jylla Nagaland naduh ki kynthei bad shynrang.
Katei ka jingïakop pynher kali ka long ka rynsan na ka bynta kito kiba ju sngewtynnad ban ñiah pynsted ïaki kali bad pyni ïaki sap ñiah kali ha kiba bun ki rukom, ba naka liang kitei ki nongpynïaid kila pynlong da katei ka jingïakop haki jaka kiba biang ym ban ñiah haki surok bah kaba wanrah ka jingma jingmynsaw naka bynta ki nongleit nongwan.
Ka thong jong ka kynhun Young Minds ban pynlong ïa katei ka tamasa Sohshan lane ka Strawberry Festival ka long ban kyntiew ïaka kam rep strawberry bad kumjuh ruh ban bteng ban leh ïaki kam isynei naka pisa kaba mih na katei ka tamasa kumba ka la ju leh haki por kiba lah dep ban ïarap ïa ki longing longsem kiba duk kiba jynjar.
Ha kane ka sngi, la sdang ïa katei ka jingpynmareh kali da ka jingkaweh lama da u kongsan katei ka sngi u Bah Kitbok Kharlukhi uba dei u Sports Secretary jong ka Seng RBYF Eastern Zone haka jingïadonlang ki nongïalam ka Youngminds, u Bah Lover Lyngdoh uba dei u Adviser, u Bah Isynei Hinge uba dei u President, u Bah Richard Lyngdoh Secretary lem bad kiwei kiwei ki riew pawkhmat ka thaiñ.
Shuh shuh ki nongïalam ka Youngminds ki la pynpaw ruh ba haka sngi pynkut kata lashai ka sngi ka 25 tarik u Lber 2023 kin don shibun ki jingpynbyrngia na ki nongrwai ba paw ka jylla ki ban pynsngewtynnad bad pynkhihwin ïaka janmiet, kiba kynthup naduh ka kynhun tem Colours, u Wanjop Sohkhlet, u DJ Wanshan, DJ D-Bryan bad kiwei kiwei bad la khot la wer ïaki paidbah ba kin ïa poi sha katei ka tamasa khnang ba ka jingthmu jong ka kynhun kan long kaba jop
