Nongpoh, Lber 24: Ka Synjuk ki Rangbah Shnong Ri Bhoi District mynta ka sngi hadien ka Executive Committee kaba la long ha Umsning, ka la shim ïa ka rai ban pyrshah jur na ka bynta ban pyntreikam ïa ka aiñ Uniform Civil Code bad ka la dawa mardor ruh na ki 60 ngut ki MLA ka jylla ba ki dei ban pyrshah ïa ka jingthmu ka sorkar pdeng ban pyntreikam solonsar ïa kane ka Uniform Civil Code ha baroh ki bynta jong ka ri India.
Haba kren sha ki lad pathai khubor mynta ka sngi, u General Secretary ka Synjuk ki Rangbah Shnong Ri Bhoi District, u Bah P.B Sylliang, u la ong ba ka Synjuk ki Rangbah Shnong ka pyrshah jur ban pyntreikam ïa kane ka aiñ ba la tip kum ka Uniform Civil Code kumba la ka sorkar pdeng ka la thmu ban pyntreikam solonsar ha ka ri.
U la ong ruh katkum ka rai jong ka Synjuk ki Rangbah Shnong ka la dawa na ki 60 ngut ki MLA jong ka jylla ba ki dei ban ieng pyrshah ïa kane ka Uniform Civil Code bad ban rah ruh ïa kane ka mat ha ka ïing Dorbar thaw aiñ ka jylla, namar shisien ba la pyntreikam solonsar ïa kane ka aiñ kan ktah jur naduh ki riti ki dustur bad ka jinglong kyrpang jong ka jaid bynriew jongngi hapoh kane ka jylla barit paid.
“Ka Synjuk kam kwah ba kane ka Uniform Civil Code kan treikam hapoh ka jylla ba ka ktah ïa ka riti ka dustur, ka jinglong trai ïa ka khyndew ka shyiap katkum ka Sixth Scheduled bad wat ka KHADC kaba dei ka bynta ban peit ïa ka riti ka dustur bad ban pynnneh pynsah ïa ka khyndew ka shyiap ka lah ban jah noh lada treikam kane ka Uniform Civil Code” ong u Bah P.B Sylling bad bynrap ruh kumba ki kynhun balang bapher bapher ruh ki la pyrshah ïa kane ka ain ka synjuk ruh ka kyrshan ba ka sorkar Meghalaya (MDA II) ka dei ban pyrshah jur bad ban ïa kren ha ïing Dorbar thaw ban pyrshah jur ïa kane ka ain Uniform Civil Code” u la bynrap.
Ha kaei ka bynta pat ka seng ka pyrshah ruh ban long Rangbah Shnong ïa ki Garo ha ki Shnong ba hap ha ka Raid Marwet jong ka Hima Mylliem bad kum ka Synjuk ka shaniah ïa ka Hima Mylliem ba kan pyntreikam bad ba kan bud katkum ki riti ki dustur ba ki Garo kim don hok ban long Rangbah Shnong hapoh ki Raid ne ki Hima hapoh ka ri Khasi Jaintia lait noh ha Garo Hills.
Shuh shuh, ka Synjuk ka la kren ruh halor ka jingrem palat ka dor ban register khyndew ba kane ka la ktah shisha ïa ki longing baduk ba kyrduh bad kum ka sorkar ka hap ban pyrkhat kyrpang ïa kane ka bynta namar ka jingshim dor heh palat ban register khyndew ka la ktah ïa ki paidbah bad teng teng ruh ka jingpynslem palat ban ai ïa ka registration khyndew kaba la shim por bun bnai ka ka ktah ïa ki paidbah ba kum ka synjuk ka dawa ba ka sorkar ka hap ban ïa kren kyrpang halor kane ka bynta khnang ba ki paidbah kin suk ban pynshisha ba ki long trai ïa ka khyndew ka shyiap lada ki la pyndep ban register ïa ki jaka puta ba la ithuh da ka sorkar, u la bynrap.
