Kyntu u DC ïa ki paidbah ba kin nym bam ïa ki dohkha kiba ïap kiba per ha ka wah Lukha

Khliehriat lber 24 : U Deputy Commissioner ka East Jaiñtia Hills District, u Abhilash Banarwal, IAS, hadien ba u la ïoh kawei ka jingujor ba ïap ki dohkha ha ka wah Lukha, kaba la jia myn ha ka 22 tarik mynta u bnai, u la kyntu jur ïa ki paidbah jong ka shnong Sonapyrdi bad ki shnong ba mar jan kiba sah hajan ka wah Lukha, ba kim dei ban bam ïa ki dohkha kiba ïap kiba per ha sla um, namar ïoh kan ktah ïa ka koit ka khiah.
Kum ban shu phai dien, katkum ki shithi ujor ba la soi da u General Secretary jong ka Sonapyrdi Tourism Economis Developmet Society (STEDS), u bah T.L.Gympad, kumjuh ruh ka shithi na ka KSU Narpuh ba la soi da u President, u bah K.S.Suchiang bad u General Secretary, u bah S.Bamon, ki la iathuh ia ka jingjia kaba la jia ha kaba ki dohkha kiba la iap ki la per halor ka sla um, ki don ruh bun ki dohkha kiba la jan ïap, ki bym lah shuh ban jngi ha um, ki la pynpaw ruh ba imat kane ka jingiap ki dohkha, ka dei namar ka jingpyntuid jakhlia chemical na ki karkhana dewbilat, kiba la pyntuid sha ka wah Lunar kaba ïasoh bad ka wah Lukha, na kata ka daw ka wah Lukha kan sa kylla sniew.
La ong ruh ba kane ka jingjia ba ïap ki dohkha ka la jia man la u snem, kata naduh u snem 2007 bad ka ju jia ha ka por ba ther jur u slap uba neh ar sngi lai sngi, ha ka por ba heh ka um. Ki dkhot ka seng ki la lap ruh ba ki la don ki briew ba kynthup ruh ki kynthei, ki khynnah kiba la hiar sha wah Lukha ha katei ka sngi kiba dang ïa muja ka ïa tong dohkha ïap bad tong ruh ïa kito ki dohkha kiba la jan ïap, na ka liang kitei ki nongialam ka seng ruh, ki la dep kyntu ïa ki ba kim nym bam ïa ki dohkha kiba ïap bad kito kiba la jan ïap namar ioh kan ktah ïa ka koit ka khiah.