Rah kam pynroi ka Assam tang haki jaka ba don jingkajia pud, ym paw kam pynroi ka Meghalaya ha khappud

Nongpoh, Lber 24: Ka Confederation of Ri-Bhoi People (CoRP), kala ther tyngeh ïa ka sorkar jylla ba kam shym la leh eiei ban rah ki kam pynroi sha ki thaiñ khappud ka jylla, katba ka sorkar Assam kala nang pyndep ïaki kamram ban tei bad rah ki kam pynroi khamtam haki jaka kajia pud tang ban ioh kam trai ïaki jaka kumla la iohi ba ka Assam mynta ka sdang ban siang ïaki surok bad kiwei ki kam pynroi haki jaka kajia pud, katba ka sorkar Meghalaya ka shu long tang ka nongpeitkai khlem leh eiei.
Haba phah ïaka kyrwoh naka liang u Bah Bandari Ryntathiang President ba rangbah ka CoRP u la ong ba dang ha kine ki sngi ka seng kala wan ban pynlong ka jingleit jngoh bad jurip ïaki shnong haka thaiñ Block II jong ka Raid Nongtung ha Ri-Bhoi, hynrei kaba sngew lyngngoh ka long ka Assam kala dep ban tei ïaki stadium, ki indoor stadium, ki madan phutbol haka thaiñ Umlaper, hynrei sngewsih ba ka sorkar Meghalaya kam leh eiei bad long tang ka nongpeitkai bad kam don kano kano ka kam pynroi ba wanrah da ka sorkar Meghalaya.
Ki dak ki shin ki paw ruh ba ka jingbuit tuh jong ka sorkar Assam ka long da kaba shna surok bad wanrah ki kam pynroi tang haki jaka ba kajia pud da ka jingthmu ban kam bad klun jubor ïaki jaka, katba haki shnong ba marjan wat ba ki lynti ïaid ki paidbah ki shem jingeh ban leit ban wan namar ba ka sorkar Meghalaya kam iohi ïaki jingeh ki paidbah.
Naka liang ka seng kala leit ruh ban ïakynduh ïaki paidbah kiba shong ba sah ha katei ka thaiñ Block II ban kylli pyrthew shuwa ba ki ar jylla kin sdang biang ka jingpynbeit pud haka wat kaba ar, bad ka seng ka lap ba bun naki paidbah khamtam ki shnong khasi ha ka Raid Nongtung ki kwah dik dik ba don beit sha Meghalaya ym sha Assam namar ki kot ki sla jong ki naduh ki EPIC, ki dulir jaka ki don sha ka jylla Meghalaya
Kiwei ki jaitbynriew ki bym dei khasi kiba shong ba sah ha katei ka thaiñ, kim salia la ki ngat sha Assam ne Meghalaya tang ban ioh shong neh bad shongsuk, hynrei ka sorkar Meghalaya ka dei ban sngap ïaki briew lajong kiba dei ki khasi ba shong ba sah ha katei ka thaiñ.
Naka liang ka seng ka buh ka jingkyrpad sha ka sorkar khamtam u Bah Prestone Tynsong Symbud Myntri Rangbah ba ym dei ban shu ngiat jubor ïaki briew lajong sha Assam khlem d alum da lang ïa u paidbah nongshong shnong ka Raid Nongtung bad kumno u nud ban ong ba ki 22 tylli ki shnong jong ka Raid Nongtung ki hap sha Assam, bad kum ka seng da lei lei kam lah ban pdiang ïa kitei ki jingong jong utei u nongïalam.
Ka seng ka kyntu ruh ïaka sorkar Meghalaya ba kan shim khia ban lum ïa u paidbah ha Raid Nongtung naduh ki Rangbah Shnong, ki Sordar Shnong, ki Synjuk Rangbah Shnong, ki Syiem Raid Nongtung ban wad ïa ka jing shisha shuwa ka jingpynbeit pud bad kum ka seng hi kan nym ailad da leilei ïa kitei ki jaka ban leit sha Assam, la bynrap u Bah Bandari.