Nongpoh, Risaw 19: Ha ka sien kaba 5, ka Adventurous Hynniewtrep Off-Roaders, (AHOR) mynta u snem ka la bteng ban pynlong ïa kawei na ka tamasa niah Kali ha ki surok khohruh khohram ba la tip kum ka, ‘5th AHOR 4X4 Off-Road Challenge 2023’ ba la plie paidbah noh mynta ka sngi ha Kharsati Natural Park ha Ri Bhoi District.
Kane ka dei ka rynsan kaba 3 sngi kaba la sdang mynta ka sngi bad ka ban sa pynkut noh ha ka 21 tarik u Risaw 2023 ha katei ka jaka kaba ka AHOR ka la ju pynlong man la u snem ban ai rynsan na ka bynta kito kiba don sap ha ka kam niah kali ha ki surok ba khuhruh khohram.
Haba kren sha ki lad pathai khubor, u Bah Damian Umdor, President ka AHOR, u la ong ba ha ka jingsdang jong kane ka jingïakop niah kali ki la don kiba la wan ban shim bynta na ka jylla bad kiwei ki jylla jong ka jylla shatei lam mihngi ka ri India bad kumba long haduh mynta ka sngi ba la sdang ïa kane ka tamasa niah kali ki la poi haduh 60 ngut kiba la wan ban shim bynta ha kane ka tamasa niah kali.
U la ong ruh mynta u snem ka AHOR ka la kham phai khmat ban shna ïa kita ki surrok kiba kham jynujar bsan ïaid ki kali kaba long kum ka jingphrang ïa ki nongshim bynta ba kin pyni ïa ka ka sap ka phong bad ha kane ka tamasa niah kali ki la don ruh wat ki riew kynthei kiba la wan ban shim bynta ban sei ïa la ka sap ka phong ba ki don ha ka kam niah kali ha ki surok kiba khohruh khohram.
“Ka AHOR ka la phiah ruh ïa kane ka tamasa niah kali ha ki saw bynta kata ki kynthup ïa ka thup jong ki kynthei kaba dei tang ki kynthei (Ladies Category), kaba ar ka dei na ka bynta ki Kali kiba ym pat pynkylla lane ki Strock Category, ka balai, ki dei ki Semi Modified category lane ki Kali kiba la pynkylla dur malu mala bad kaba saw pat ka dei beit tang na ka bynta ka Modified Category ba ki la pynkylla ban pynwandur ha ki bynta bapher bapher jong ka Kali’ ong u Bah Umdor bad bynrap ruh kane ka kynti ka dei ka kynti kaba kham pher ha kaba ki nongshim bynta kiba la kham tbit na kylleng ki jylla ki wan ban shim bynta” u la bynrap.
Ha kawei ka bynta, u Bah Ferdinand Jahrin, General Secretary ka AHOR, u la khot la wer ïa ki paidbah ka jylla ba kin wan ban sakhi ïa kane ka tamasa niah kali bad ka jingwan sakhi jongki, ka long ruh ka jingai mynsiem na ka bynta kito kiba don sap kyrpang ha kane ka kam niah kali ha ki surok ba khohruh khohram.
