Saw tylli ki takma khur ki nongïalehkai ka jylla na ka 34th East Zone Junior Athletics C’ship

Shillong, Risaw 19: Ka long ka burom bad ka jingsngewsarong ïa ka jylla bad ka jaidbynriew hi baroh kawei ha kaba saw ngut ki nongïalehkai ka Meghalaya hapoh ka lama jong ka Meghalaya Athletics Association kiba la leit ban ïashimbynta ha ka lympung ïakop jong ka 34th East Zone Junior Athletics Championship, ha Kolkata, 2023 ki la ïoh ban khur takma.
Napdeng kine ki saw ngut kiba la khur takma ki kynthup lai ngut kynthei bad u wei u shynrang, kiba la khur ar tylli ka rupa bad ar tylli ka rnong.
Ka Rukini RT Dkhar kaba la wan kyrdan ba ar ban khur takma rupa ha rynsan ïakop mareh (Event) 600M, Under-14, Girls. bad ka la shimpor 1:42.80 (New Personal Best) ban pyndep ïa ka jingmareh.
Ka Sibilda Maring ka la jop takma rupa ha rynsan ïakop (Event) High Jump, Under-16, Girls. Ka jingjrong ba ka la kynthih ka long: 1.45M (New Personal Best). U Pringchang N Sangma u la khur takma rnong ha rynsan ïakop High Jump, Under20 jong ki shynrang bad ka jingjrong kaba u la lah ban kynthih (Height Cleard) ka long 1.80M. Katba ka Anrisha Klein ka la jop takma rnong ha ka High Jump, Under18, ka jingjrong ba ka la lah ban kynthih ka long 1.50M (New Personal Best).
Na ka liang jong ka Meghalaya Athletics Association (MAA) ka la ai khublei ïa kine ki nongïalehkai kiba la wanrah burom, ryngkat ruh ïa i coach Pleasantly Synnah bad ka Kong Maradona physio, shuh shuh, na ka liang jong ka synjuk ka kwah ban ai khublei ruh ïa ka Kong Kong Isawanda Laloo IAS kaba la ai jingkyrshan lem ïa ka kynhun ha ka leit ka wan na bynta ki nongïalehkai.