Mawkyrwat, Risaw 19: Ka Mawten Sports Club mynta ka sngi ka la long biang ka lahduh ha ka lympung ïalehkai kynjatbol phainal kaba la tip kum ka Super Division MDSA League 2023 ba la pynïaid da ka Mawkyrwat District Sports Association (MDSA) hapoh madan Artificial Turf, Nonglang, South West Khasi Hills District.
Haba phai ha ka jingïalehkai ka la long ka jingïalehkai kaba itynnad bha ha kaba ki ‘rangïalehki jong ar tylli ki kynhun ki don beit ïa ka thong ban pynjop khnang ban ïoh ban mihkhmat sha ka Meghalaya State League. Kumta ha ka jingïalehkai, ka Wahsiej United Sports & Cultural Club ka la ïoh thep ïa ka kol kaba nyngkong eh da u Bosming Iawsai ha ka minit kaba 34 jong ka kyllastep bad ka Mawten Sports Club pat lyngba ka Penalty ba la kynjat da u Oversharp Iawphniaw ha ka minit kaba 90+1 minit ha ka kyllamiet.
Namarkata, ha kaba kut jong ka jingïalehkai, ka Mawten Sports Club ka la long ka nongjop namar katkum ka jingkheiñ ha ki poiñ, ka Mawten SC ka la ïoh 14 poiñ katba ka Wahsiej United Sports & Cultural Club pat ka la ïohh 10 poiñ.
Ha kaba kut jong ka jingïalehkai ha kane ka sngi la ïoh bam sam ïa ki khusnam sha ka Mawten Sports Club kaba la rah ïa ka nam jop bad ki khusnam shimet kata nongapkol ba tbit sha u Hulbinroy Khardewsaw jong ka Rangjadong Sports Club, ki nongthep kol bun eh sha u Geovanny Syiemiong jong ka Sakwang Sports Club bad u Bosmingstar Iawsei jong ka Wahsiej United Sports & Cultural Club kiba la thep mar 7 kol bad ‘rangïalehkai ba tbit sha u Manbhalang Nongmin jong ka Mawten Sports Club. Shuh shuh la ïoh ruh ban pynkup burom ïa ki khynnah kiba la leit iashimbynta ha ka National Football Federation Championship.
Ïa kane ka lympung ïalehkai kynjatbol la wan ban pynhap pyrda da u bah Renikton Lyngdoh Tongkhar, MLA ka Mawkyrwat Constituency kum u kongsan ryngkat ka jingïadonlang ki nongkitkam jong ka Mawkyrwat District Sports Association (MDSA).
Ïa ka jingïalang ha kane ka sngi la pynïaid da u bah T. Lyngwa, IAS, Deputy Commissioner, South West Khasi Hills District, President ka Mawkyrwat District Sports Association (MDSA).
