SCL 1st Division: Jop kput ka Malli SC ïa ka Young Guns CC

Shillong, Rymphang 21: Ka kynhun ïalehkai jong ka Malli SC ka la khur ïa ka jingjop ha ka lympung lehkai Shillong Cricket League 1st Division hadien ba ka la lah ban pynliem kput ïa ka Young Guns CC haduh 137 ron ha ka jingïakhun kaba la long hynne ka sngi.
Haba phai sha ka jingïalehkai, ïa ka toss la jop da ka kynhun Malki SC kaba la jied ban tied nyngkong, bad na ka liang jong ka kynhun ka la ïoh ban buh thong haduh 268 ron, bad shah pynhap tang 3 ngut haduh kaba kut jong ka 40.0 over.
Napdeng ki rangtied ka kynhun u Ronnie M. Nongbri u la long u ba seisoh tam hadien ba u la khyrwit palat ïa ka spah ron, kata haduh 114 ron naki 116 bol. Katba na ka liang jong u Sylvester Mylliempdahu la ïoh ban tied 57 ron naki 54 bol.
Haba phai pat sha ki rangkawangbol ka Young guns CC, bun naki kim shym la lah ban ïalehkai bha, bad kiba la ïoh khur wicket ki kynthup tang ïa u Ankit Tamang u ba la kawang 8 over, shah tied 45 ron bad khur 2 wicket, nangta u Mickey Lyngdoh, u ba la kawang 8 over, shah tied 55 ron bad khur 1 wicket.
Haba pyrshang ban beh ïa katei ka thong ba la buh, ka Young guns CC ka la shah pynkhyllem noh baroh 10 ngut da tang 131 ron naki 32.1over. Ki rangtied ka kynhun kiba la kamai bun ron i long u Aditya Singh (40 ron naki 48 bol) bad u Rudra s Rathor (23 ron naki 31 bol), hynrei kane kam shym la ïarap ban pyllait ïa ka kynhun na ka namrem.
Haba phai pat sha ki rangkawangbol ka Malli SC kiba la seisoh tam ki long u Mickey marngar u ba la kawang 8 over, shah tied 35 ron bad khur haduh 5 wicket, nangta u Nick Dann u ba la kawang 5 over, shah tied 22 ron bad khur 3 wicket.
ïa ka namtam ha kane ka jingïakhun lane Player of the match la khur da u Ronnie M. Nongbri u ba la khyrwit spah ron (114 ron naki 116 bol) kaba la ïarap ïa ka Malli SC ban jop kput haduh 137 ron.