Ka pyrshang jong ka Sorkar Jylla ban kit noh ïa ki khynnah skul da ki Bos STEM ban weng ïa ka jingdheng kali kam shym la lah satia ban weng ïa u sohkyrdot namarba ka jingkhapngiah ha ka thaiñ Laitumkhrah ha ki kynta ba dang long skul bad ha ka por wai skul ka long beit kumjuh bad mynta leilei ka jingdheng kali ka la nang ban ar shah na ka daw ka jingkharoi ki kali bad ki Scooty ar shaka.
Ka long kaba i sangsot ban peit ïa ki nongleit nongwan kiba hap ban ïaid lyngba ka nongbah Shillong khamtam eh naduh ki thaiñ Umshyrpi ter ter, nangta na ki thaiñ Mawkhar, Laitumkhrah, Nongthymmai, Khyndai Lad, Polo, Jaïaw, naduh ka por 8 baje mynstep ter ter haduh 10 baje bad ha ka por mynsngi naduh ka por 1:00 baje ter ter haduh 4:00 baje eiei, namar ka jingjur palat ka dheng kali kaba la ingiah ban peit.
Ban shu peit kum ki riewpaidbah ym lah satia ban tip nangno ka dheng kali ka sdang khamtam eh haba naduh ki thaiñ Barik ter ter haduh Dhanketi bad Laitumkhrah ba ki kali ki la shu ieng beit hajuh tang shu poi kitei ki por. Tang shu dap 9 baje ter ter, ka jingdheng kali ha surok Shillong-Jowai ka long shaba palat liam. Teng teng la i synei ban peit ïa ki Pulit kiba pynïaid kali, ki bapli ki la shu phuh syep hi puk tangba ki hylla bad kynhied ïa ki nongñiah kali tamsneng watla ki ïohi ba ka la don lypa ka jingdheng kali hynrei ki dang tynruh rak rak da ka jingkhlem akor. Kaba kham i sangsot ka long ba poi haduh u pud ba wat ki heh Pulit ruh ki hap ban mih lang ban pynïaid kali kumba la ju ïohi ha Barik Point ha Rilbong Point, ha Dhankheti manla ka por, kaba dei ka pdengbah jong ka dheng kali ha ka nongbah. Khlem artatien, ki Pulit ki don la ki jong ki jingai jingmut na ka bynta kine ki jingeh kaba ki ïakynduh kaba pynktha khlieh bad pynsniew mynsiem ïa ki tang shu poi ki aiom long skul.
Ïa ka dheng kali yn ym lah shuh ban pynduna namarba ki surok ki ïai sah kumjuh katba ki kali ki nang kharoi manla ka sngi.
Ka jingwanrah jong ka Sorkar da ki Bos ban leit on bad ban leit shaw ïa ki khynnah skul kam shym la weng satia ïa ka dheng kali namar kiba bun hi ki kmie ki kpa kim da mon eh ban phah ïa ki khun da kine ki Bos ba la ai sngewbha da ka Sorkar namarba ki dang kwah ban pynkjeh bad pynleh khunlung.
Jin lada baroh ki kmie ki kpa kiba phah skul ïa ki khun ha ki skul kiba don ha ka thaiñ Laitumkhrah ban phah noh da ki skul Bos kan jin da la weng khyndiat ïa ka jingdheng kali ha ka thain Laitumkhrah kaba long ka daw ka jingdheng kali sha Lachaumiere, Dhankheti, sha surok Shillong-Jowai, Barik, Malki Point. Lada kawei ka bus kan kit ym duna 40 haduh 50 ngut ki khynnah lehse ka la ïarap shikatdeh ei.
Kumta lada shu kheiñ, lada kawei kawei ka skul ka don kumba 800 ngut ki khynnah skul ka mut kin don beit ym duna ïa ka 500 ne 600 tylli ki kali rit kiba la ieng laiñ lypa ha shi lynter ka surok ba don kito ki skul naduh ka por ba ki wan buh haduh ka por ba ki wan shaw skul.
La ju ïohi ba ka surok kali naduh Barik ter ter haduh Laitumkhrah ka dei ka surok kaba don beit ka dheng kali. Kumta ka shong mynta ha ka jingstad jong ka Sorkar ban tehlakam, namar ban pynheh ïa ka surok ym donlad shuh hynrei ka dei beit sa tang ban pyndonkam da ka jabieng ban pynduna ïa ka dheng kali, lym kumta ki jingeh ki la nang ïai mih bad ka dheng kali kan kham nang jur shuh shuh.
Ka ladei ruh ka por ba ki bor pynïaid skul kim dei ban ap ïa ka Sorkar namar bunsien hi ki polisi treikam jong ka Sorkar ki dei kiba suki, kumta donkam ïa ki ban leit ai jingmut ïa ki ophisar lane beit beit sha u Myntri Rangbah ne Myntri ba dei peit ïa ka tnad pule puthi ne Transport khnang ba ka kam kan ïaid kham stet.
Kam myntoi ïa ki kmie ki kpa ban khñium, ban kynthoh ïa ki Pulit pynïaid kali lane ïano ïano lada kim tip ïa ka daw tynrai baroh halor ka jingdheng kali. Ki bor pynïaid skul ki la dei ruh ban kyndit bynriew naduh mynta namar katei ka dheng kali kan poi haduh u pud ba ki khynnah skul ki la hap ban mih lypa ar kynta shwa ka por, khamtam ha ka por ba long eksamin. Ym tang katta, kane kan ktah ruh ïa ka por haba ki khynnah skul ki leit phai sha iing.
