SCA Cricket League 3rd Division: Jop ka Sanmer & Youngstar

Shillong, Kyllalyngkot 24: Ka Sanmer bad ka Youngstar ki la ïoh ban khur jingjop ha ar tylli ki jingïalehkai jong ka lympung Shillong Cricket League Third division 2024-25 ba la pynïaid da ka Shillong Cricket Association ha madan Urkaliar, Shillong.
Ka jingïalehkai kaba nyngkong la sakhi ïa ka Sanmer kaba la jop kput haduh 108 ron ïa ka Shibakha. Ka jingïakhun ka la sdang ha kaba ka Shibakha ka la aiti ïa ka Sanmer ban tied nyngkong hadien ba jop ïa ka toss.
Ka Sanmer ka la lah ba kan kamai 194 ron haduh kaba kut jong ka 20 over ba la mang bad khyllem 4 wiket. U Donbor Marbaniang (77 ron naki 45 bol) bad u Banshan Dkhar (62 ron naki 46 bol) ki dei ki nongtied kiba la kamai bun ron tam ïa ka kynhun.
Napdeng ki rangkawang bol ka liang pyrshah u Samir Sahani u la khur 2 wiket naki 3 over bad shah tied 29 ron, nangta u Sunil Yadav u la khur 1 wiket naki 4 over bad shah tied 16 ron.
Haba pyrshang beh ïa ka thong ba la buh, ka Shibakha ka la shah pynkut noh tang 86 ron naba khyllem baroh 10 wiket tang ha ka 13.5 over, u Sunil Yadav u la tied 27 ron naki 20 bol nangta u Moon kharshing u la kamai 14 ron naki 18 bol.
Na ka Sanmer kiba la tyngshaiñ ha ka bol ki long u Pynshngain Dkhar (3.5 over: shah tied 15 r: khur 4 wiket), hynrei ka namtam ka long sha u Kiran Thapa (4 over: shah tied 19 ron) nalor ba u la kamai 32 ron ha ka por ba tied u la ïoh ban khur 3 wiket pat sa ha ka bowling ban khur syndon ïa ka khusnam Player of the match.
Ha ka jingïalehkai kaba ar, ka Youngstar ka la pynliem ïa ka Combine XI da 10 wiket. Ka toss la jop da ka Combine XI bad jied ban tied nyngkong, ki nongtied kane ka kynhun ki la lah ban kamai tang 86 ron naba khyllem baroh 10 wiket hadien 18.3 over.
Dei tang u Shining Star Chyne marwei u ba la seisoh ha ka tied da kaba kamai 22 ron naki 38 bol. Ha ka bowling u Asik Alam u la khur 4 wiket naki 4 over, shah tied 16 ron, nangta u Rajdeep Barua u la khur 2 wiket naki 3 over bad shah tied 17 ron. Haba jubab ka Youngstar ka la lah ban kynjoh ïa ka 88 tang ha ka 6.4 over bad khlem da shah pynhap wiket ban jop suk ïa ka jingïalehkai. U Suraj Chettri u la kamai 24 ron naki 16 bol, hynrei ka nam Player of the Match la khur da u Asik Alam uba la khur 4 wiket ha ka bol bad kamai 50 ron naki 25 bol ha ka por tied.