Jop bun kol ka Mawlai & Lajong ha ka OC Blue Shillong Premier League

Shillong, Kyllalyngkot 24: Ka Mawlai SC – kaba dei ka lahduh ba bat ïa ka burom, ryngkat ka Shillong Lajong FC kaba bud nadien, ki la jop kput ha ki jingïalehkai jong ki pyrshah ïa ka Ryntih FC bad Sawmer SC ha ka lympung OC Blue Shillong Premier League 2024 ha madan First Ground – SSA Stadium, Polo, hynne ka sngi Thohdieng.
Ka Mawlai ka la pynjemkhnap ïa ka Ryntih ha kawei na ki jingïalehkai kaba khlaiñ shiliang ha ka histori jong ka SPL, da kaba jop kput haduh 10-1 kol, katba shuwa kane, ka Lajong ka la jop suk da 6-0 kol ïa ka Sawmer.
U Yohaan Benjamin (10’), Riborlang L Lyngkhoi (25’), Deibormame Tongper (27’, 61’) bad u Babysunday Marngar (54’, 59’) ki la pynkhihjar na bynta ka Lajong ha ka jingïalehkai kaba nyngkong, katba ka Mawlai ka la pynkhih ïa ki 10 tylli ki kol lyngba u Khrawkupar Jana (27’), Fullmoon Mukhim (33’), Samlang Rympei (39’), Arkibor Makhroh (43’), Baiaikara Swer (48’, 89’), Reformer Pale (66’, 78’), Banskhemlang Mawlong (70’) bad u Overkindness L Mawnai (90’+1). U Basuklang Bina (56’) u la thep ïa ka shi kol na bynta ka Ryntih.
Da kane ka namjop kamut ba ka Mawlai kan dang bteng ban synshar ha khlieh duh jong ka miej da kaba kamai 28 poiñt na ki 10 tylli ki jingïalehkai, katba ka Lajong ha ka kyrdan ba ar da kaba kamai 25 poiñ.
Ha kawei ka liang, ka Sawmer ka la mad mynta haduh saw sien lynter ki namrem bad ka don ha ka kyrdan ba hynñiew ha ka miej da kaba ïoh 11 poiñ. Katba ka Ryntih ka don shatrai duh jong ka miej da tang 3 poiñ, bad kane ka dei ka namrem kaba 9 sien lynter ïa ka kynhun.
Ha ka por ba kine ki kynhun ki ïakynduh ha ka 1st leg, baroh ar ka Mawlai bad ka Lajong ki la jop da 4-1 kol ïa ka Ryntih bad ïa ka Sawmer. Hynrei hynne ka sngi Thohdieng kine ki kynhun ba radbah jong ka phutbol ha Shillong ki la lah ban lehkai kham shuh shuh, da kaba nang pynkhraw shuh ïa ka jingïoh thep kol jong ki.
Ka wat ïakhun ba khadwei (11th round) jong ka SPL kan sdang mynta ka sngi. Ha ka por 11 baje mynstep ka jingïalehkai kan long hapdeng ka Nangkiew Irat SC pyrshah ïa ka Langsning FC, yn bud sa ka jingïalehkai hapdeng ka Rangdajied United FC pyrshah ïa ka Nongrim Hills SC ha ka por 2 shiteng mynsngi. Ha ka 1st leg, ka Nangkiew Irat ka la jop da 3-1 kol ïa ka Langsning ha ka 29 tarik Risaw, bad ka Rangdajied ka la jop salit da 1-0 kol ïa ka Nongrim Hills ha ka 8 tarik Naiwieng.