Mynta ka sngi yn pynhap pyrda noh ïa ka 6th Meghalaya Games ha Jowai

0

Jowai, Kyllalyngkot 24: Ka 6th Meghalaya Games 2025 ba la plie paidbah ha ka 21 tarik Kyllalyngkot, kan sa ïoh ban khylliap pyrda noh mynta ka sngi ka 25 tarik Kyllalyngkot, 2025 ha Kiang Nongbah Stadium, Jowai ha ka por 4 baje nohphai sngi.
Ha kane ka sngi yn wan Kongsan da u ma Sniawbhalang Dhar-Symbud Myntri Rangbah ka Jylla, u Bah Shakliar Warjri-Myntri ka tnad Sports kum u symbud Kongsan, ha ka jingïadonlang u MLA ka Jowai-ma Wailadmiki Shylla.
Yn wan pynshit pynsngaiñ ha kane ka sngi da ki kynhun rwai jong ka The LYNX, ka jingrwai ïa ka State Anthem shuwa ban pdiang burom ïa ki Kongsan, ka jingïaid paidbah jong ki nongïashimbynta (Parade of Athlete). Yn ïoh ka jingkhren na u symbud kongsan bad kongsan shuwa ban ban sam ïa ka Trophy sha ka lahduh.
Khadduh khadwai yn ïoh ban pynhap bad aiti ïa ka lama ban pynbna ba ka 6th Meghalaya Games 2025 ha Jowai ka la kut.
Lah ban kdew, mynta u snem ki don palat 3500 ngut ki nongïashimbynta (athlete) kiba ïakhun na bynta ki 1600 tylli ki takma ha ki 23 tylli ki jaka ïalehkai ba don ha kylleng ka West Jaiñtia Hills District.
Kine ki long ki resol jong katto katne ki jingïalehkai ba la ïohlum:
FOOTBALL:
Ka Ri Bhoi District ka la lah ba kan khur biang ïa ka takma ksiar sa mynta ka kynti ha ka phutbol ki shynrang Under-17 (Football U-17 Boys) jong ka 6th Meghalaya Games hadien ba ka la lah ban pynliem ïa ka West Khasi Hills District da 1 kol ha ka final hynne ka sngi Thohdieng ba la long ha Kiang Nangbah Stadium, Jowai.
Ha kawei ka liang, ha ka kyrdan ba lai ka jingïaknieh ban khur ïa ka takma rnong jong ki shynrang la sakhi ïa ka West Jaiñtia Hills kaba la pynliem ïa ka South West Khasi Hills haduh 7-2 kol.
Na bynta ki kynthei, ka East Khasi Hills District ka la ïoh khur ïa ka takma ksiar da kaba pynliem ïa ka Ri Bhoi da shi kol ha ka final. Katba ka South West Khasi Hills ka la pynliem ïa ka West Jaiñtia Hills da 1 kol na bynta ka kyrdan ba lai (rnong).
Nalor ki takma la ïoh ruh ban sam khusnam sha ki rang & thei ïalehkai kiba kynsai, ha kaba ïa ka nam ‘Best Player’ jong ki kynthei la ïoh da ka Sanfida Nongrum jong ka East Khasi Hills, katba u Defender Sylliang jong ka Ri bhoi District u la khur na ka liang ki shynrang.
U Bah Shakliar Warjri – Myntri ka tnad Sports jong ka Sorkar Jylla u la long kum u Kongsan, nangta u Bah Cliff Nongrum – Vice President ka MFA lem bad u B. Richard Uriah-Principal jong ka North Liberty H.S. School, kum ki symbud kongsan.
Kiwei pat ki riew pawkhmat kiba donlang ha kane ka sngi ki kynthup ïa ki dkhot Executive Members jong ka MFA, ki dkhot nongkitkam ka MSOA, ki coach, WJDSA, ki Secretary jong ki synjuk bapher bapher, lem bad ki riew pawkhmat jong ka West Jaintia Hills District.
Armwrestling:
Ka jingïalehkai ïakhun kti ne ka Armwrestling kaba la long mynta ka sngi 24 tarik u Kyllalyngkot, 2025 ha Mission Compound Sports Cultural Hall shi bynta na ka 6th Meghalaya Games, ïa ki khusnam sha ki nongjop la sam mynta ka sngi haka jingïalang ba lyngkot bala pynlong ha katei hi ka Hall.
Haba phai sha ki nongjop ha kane ka jingïakhun haka liang jong ki Women 50 kg Below la jop da ka Anisha Jyrwa na EKHD kala la ïoh ïa ka Takma ksiar, ka Melinda Mawlong na EKHD kala ïoh ïa ka takma rupa bad ka Milarita L. Nongbri na EKHD kala ïoh ïa ka takma rnong.
Ha ka Women 60 kg Below ka Kristobalin N. Sangma na NGHD kala la ïoh ïa ka Takma ksiar, ka Doris Waniang na WKHD kala la ïoh ïa ka Takma rupa bad ka Parkles T. Lyngkhei na EKHD kala la ïoh ïa ka Takma rnong.
Ha ka Women 60 kg Above ka Monica Syntem na WJHD kala la ioh ia ka Takma ksiar, ka Iaryngkatdor Kurkalang na EKHD kala la ioh ia ka Takma rupa bad ka Larishisha Kharbani na WKHD kala la ioh ia ka Takma rnong.
Ha ka Men 55 kg Below u Shanborlang Marngar na WKHD ula la ïoh ïa ka Takma ksiar, u Frankystar Mawlieh na WKHD ula la ïoh ïa ka Takma rupa bad u Roderick Pou Leong Lyngdoh na EKHD ula la ïoh ïa ka Takma rnong.
Ha ka Men 65 kg Below u Riphaiki Saio na WJHD ula la ïoh ïa ka Takma ksiar, u Donnam Kharkongor na EKHD ula la ïoh ïa ka Takma rupa bad u Dapkmenlang Lyngdoh na SWKHD ula la ïoh ïa ka Takma rnong.
Haka Men 75 kg Below u Nangapjingbha Nongrum na EKHD ula la ïoh ïa ka Takma ksiar, u Wilbartson Shangoi na WKHD ula la ïoh ïa ka Takma rupa bad u Hamelasiewdor Diengdoh na EWKHD ula la ïoh ïa ka Takma rnong.
Katba ha ka Men 75 kg Above u Mebansan Sangma na SWKHD ula la ïoh ïa ka Takma ksiar, u Pynshailang Narlong na Ri-Bhoi District ula la ïoh ïa ka Takma rupa bad u Pynkupborlang Iawphniaw na Ri-Bhoi District ula la ïoh ïa ka Takma rnong.
Sport Climbing:
Ka South West Khasi Hills kala wan hakhmat eh ha ka Sport Climbing ha kane ka 6th Meghalaya Games 2025, ha Jowai, kaba la long ha ka 23 tarik u Kyllalyngkot, 2025 (sngi Palei), ha Kiang Nangbah Indoor Sports Hall.
Ki District kiba la ïoh ban khur Takma ki long kumne ka South West Khasi Hills District kala ïoh ban khur haduh ar (2) tylli ki takma ksiar, ka East Khasi Hills kala ïoh khur kawei (1) ka takma ksiar, lai (3) tylli ki rupa bad kawei (1) ka rnong. Ka West Jaiñtia Hills kala ïoh khur kawei (1) ka takma ksiar bad kawei (1) ka rnong. Ka East Garo Hills ar (2) tylli ki takma rnong. Ka South Garo Hills kawei (1) ka takma rupa.
Softball:
Ha ka jingïakhun phainal jong ka Softball bala long ha ka 23 tarik Kyllalyngkot, 2024 (sngi Palei) ha madan Jrisaleiñ, ka East Khasi Hills District (EKH) ka la ïoh ban khur shalade ïa ki takma ksiar ha baroh ar liang jong ki khynnah shynrang bad kynthei.
Ka East Jaiñtia Hills kaba la rem ha ka phainal kala khur rupa, bud sa ka Ri-Bhoi District ha ka kyrdan ba lai kaba la ïoh ïaka takma rnong ha ka liang ki shynrang. Na liang ki kynthei ka West Jaintia Hills District ka la ïoh takma rupa naba rem ha ka phainal, katba ka takma rnong la khur da ka West Khasi Hills District.
Ka Neha Hajong na EKH kala ïoh ïaka nam best pitcher haka liang ki kynthei bad u Shongdor Shangpliang haka liang ki shynrang, ka Fatima Dkhar bad ka Luiza Tamang kila ïoh ïa ka nam Best Catcher bad ka nam Best Hitter. Katba u Wadphang Phawa bad u Sandy Kharchandy kila ïoh ïa ka nam Best Catcher bad Best Hitter Awards haka liang ki shynrang.
Ïa ki khusnam sha ki nongjop la sam da u bah B.S. Sohliya, Deputy Commissioner ka West Jaiñtia Hills, u President ka Meghalaya Sports Association Dr. Aman Warr, u bah R.H Rapsang, Joint Secretary ka MSA, u bah D Shabong, Working President ka MSA nalor kiwei ki.
Weightlifting
Ka Ri-Bhoi District kala ïoh ban khur haduh 5 tylli ki takma ksiar, 5 tylli ki takma rupa bad 2 tylli ki takma rnong haka jingïakop rah mar khia lane Weightlifting kaba long shi bynta na ka 6th Meghalaya Games 2025 ha Jowai, ba la pynkut ha ka 23 tarik Kyllalyngkot (sngi Palei).
Ka East Khasi Hills District ka la wan kyrdan ba ar da kaba khur 2 tylli ki takma ksiar, 2 tylli ki takma rupa bad 4 tylli ki takma rnong. Ka West Jaiñtia Hills District kala ïoh kawei (1) ka takma ksiar, kawei (1) ka rupa bad kawei (1) ka rnong.
Ka East West Khasi Hills bad ka South West Khasi Hills kila ïoh mar kawei (1) ka takma ksiar. Ka West Garo Hills kala ïoh 2 tylli ki takma rupa bad kawei (1) ka takma rnong. Katba ka East Jaiñtia Hills kala ïoh kawei (1) ka takma rnong.
Ki rynsan ïakhun Martial Arts ba pher bapher ha ka 6th Meghalaya Games 2025, ka la bteng ban wanrah ïa ka jingsngewtynnat katba ki nongïalehkai ki pyni ïa ka jingtbit, ka jinglong ryntih, bad ka jingkut jingmut jong ki.
Taekwondo:
Ha ka Senior Girls U- 49kg, takma ksiar la khur da ka Lastymani T. Sangma (West Garo Hills), bud sa ka Nisha Thakuri (East Garo Hills) ha ka kyrdan ba ar. Ka takma rnong la khur da ka Rakita Thakuri (East Khasi Hills) bad ka Changme Nomin (Ri Bhoi).
Ha ka Men’s – 58 kg, u Odicus Lyngdoh (Ri-Bhoi) u la khur takma ksiar, bud sa u Salonbhami Suchiang (WJH) ba khur ïa ka takma rupa.
Ha ka Men’s -54 kg: Kiba la jop takma ki long u Jebiom Evanky R.Marak-WGH (ksiar), u Ajay Kumar Ray-EKH (rupa), katba ka rnong la khur da ka Ri Bhoi District.
Karate:
Ha ka Men’s Kumite- 68kg: kiba khur takma ki long; Daniel Dabiangbha Wajri – EKHD (ksiar), Evannedon Rynghang-Ri Bhoi (rupa), Kynpham Kharkongor-EKHD bad u Christibirt RSG Momin-WGH (rnong).
Men’s Kumite + 68kg: Kiba la khur takma ki long; Ialamphang Kharkongor – EKH (ksiar). Nowni Mayer F. Ryngkhlhem-WJH (rupa), Abhradeep Aguan bad u Jeremaiah Kharshandi na EKH (rnong).
Women’s Kumite -64kg: Kiba la khur takma ki long ka; Barisha Kharbani na EKH (ksiar), Stephany Makdoh na Ri Bhoi District (rupa), Sonali D. Sangma na EKH bad ka Lasabai Lakiang WJH (rnong).
Ha ka Women’s Kumite + 64kg: Ka West Jaintia Hills ka la ïoh khur baroh ar ïa ka ksiar bad rupa lyngba ka Durka Padit bad ka Seraphina Mary Biam. Ka Shildahun Kharumnuid na Ri Bhoi bad ka Suhakani Dkhar na WJH ki la khurlang ïa ka takma rnong.
Wushu:
Ha ka Men’s Changquan: U Ewansame Gashnga na EKH u la khur ïa ka takma ksiar.
Ha ka Women’ Changquan: ka takma ksiar la khur da ka Esperanza Songthiang na EKH. Ka Balakenshew Lyngdoh bad ka Becareful Ingti, baroh na Ri-Bhoi, ki la jop takma rupa bad rnong, ban nang pynkiew ïa ka jingïoh khur takma na bynta ka District.
U Kyrshanbor R. Songthiang na EKH u la khur takma ksiar ha ka Men’s Nanquan, ka jingjop jong u ka nang pynskhem ïa ka kyrdan kum u nongïalehkai ba tbit ha ki jingïalehkai.
Ha ka Men’s Traditional: U Kyrshanbor R. Songthiang u la bteng ban tyngshaiñ da kaba khur takma ksiar. bud sa u Riwordmiki Lyngdoh jong ka WJH ba la ïoh takma rupa, katba u Sunshine Ronghang jong ka Ri-Bhoi u la wan kyrdan ba lai.

Leave A Reply

Your email address will not be published.