Mad jingeh ka Meghalaya, lamkhmat ka Odisha haduh 325 ron

Shillong, Kyllalyngkot 24: Ka Meghalaya ka la hap ba kan da jaw bad syep bad syar hynnin baroh shi sngi, ka sngi jong ka jingwan kylla artad ka samoi jong ka jingsdang ban beh ka lyer ha ka sngi kaba ar ka jong ka lympung Ranji Trophy 2024-25 Elite Group A pyrshah ïa ka Odisha ba la long ha madan MCA ha Polo. Ha kaba kut jong ka sngi, ka Odisha ka la muja bha ïa ka jingailad ka madan, ha kaba ki la lah ba kin kamai haduh 523 ron hadien ba ki la hap noh 7 wiket bad ban tam kylla ïa ka Meghalaya da 325 ron.
Haba phaidien, ka Meghalaya kaba la tied nyngkong, ka la lah ba kan kamai 198 ron bad hap lut baroh ki wiket.
Haba phai biang sha ka sngi kaba ar, u Swastik Samal (80 na 107 bol) bad u Shantanu Mishra (37 na 88 tylli ki bol) ki la shah pynkhyllem noh ha u Akash Kumar Choudhary, ïa kaba la bynrap lang sa da ki lai tylli ki wiket ba la ïoh ban khur da u Md Nafees Siddique, bad shi por ka la pynlong ïa ka Odisha ba kan duh ar wiket na ka bynta 120 ron.
Pynban shwa ba ki rang kawang bol ka Meghalaya kin lah ban tehlakam, wan mih ka spah ron kaba 121 na ki 157 tylli ki bol na u Govinda Poddar bad bynrap lang da ka 78 ron na ki 100 tylli ki bol na u Sandeep Pattnaik, kaba la seng pat ïa ka nongrim kaba skhem ïa ka kynhun ïalehkai jong ka Odisha.
Ha shwa ba kine ki arngut kin bteng ban jam shakhmat, u Govinda u la ngat ha ka shrip jong u Wallambok Nongkhlaw ba la kem da u Sumit Kumar. Hadien kane, u Kartik Biswas, u la lah ban kynjoh sha ka half century katta 68 ron na ki 85 tylli ki bol ha shwa ba un khyllem noh ha u Anirudh B.
Wat lada ka Meghgalaya ka la hap shisha ban ïakhun tyngeh, pynban ka la don kawei ka khytllipmat kaba jan lah ban pynkylla dur ïa kane ka jingïakhun, kane ka dei khep jong ka lynti ka hat-trifck kaba u Hafees u la don ha shwa ba kane ka jingiakhun kan khreh ban jam noh sha kaba kut jong ka sngi, kaba ym shym la lah ba kan urlong.
Ha baroh ki bynta jong ka jingwan ban bol, ki rang kawang bol ka Meghalaya ki la lah ban bol tang 4 tylli ki maiden na baroh ki 108 over ba la ialehkai mynta ka sngi, katba ka run-rate ka Odisha pat ka long 4.84 ron.
Da kumta, ka jingïaakhun ka sngi kaba lai kan dei ka thong bah thong san ïa ki nongtied ka Meghalaya la kin lah ne em ban ïai shan slem hapdeng jong ka jingïakhun.