Shillong, Jymmang 13: Ka jingjied MLA sha ka Ïing dorbar Thawaiñ kaba thymmai ha Karnataka kaba la pynlong ïa ka jingthep vote ha ka 10 tarik bad ka jingñiew vote kaba la pynlong ha ka sngi Saitjaiñ ka Congress ka la jop kput ha ka Ïingdorbar ba don 224 ki dkhot ka la lah ban jop haduh 136 ngut ki MLA kaba la biang pura na bynta ban synshar marwei, ka BJP ka la lah ban jop 65, ka JD(S) 19.
Lah ban ïohi ba kane ka elekshon la sakhi ba ka dei ka elekshon kaba kaba khluit bha ha kaba ki noongïalam jong ka BJP bad Congress ki la hiar ban ïalap elekshon ba kynthup naduh u Modi, u Amit Shah bad kiwei ki nongïalam ka BJP, katba na ka Congress u Rahul Gandhi, ka Priyanka Gandhi nalor u Mallikarjun Kharge ki la pynlut por shikatdei ha kane ka jylla ba shathie ka India.
Lada phai dien sha ka jingïalap elekshon la ïohi ba ka BJP ka pyndonkam da ki mat ba ïadei na bynta ka India Salonsar (national issue) kum ka jingpyntreikam ïa ka UCC, ka sorkar ar enjin (double engine), ka jingpynduh ïa ka bhah kam ïa ki Muslim, ka jingmaham ban jia ka jingbym shongsuk lada synshar ka Congress bad kiwei dei ki mat katba ka Congress pat ka pyndonkam da ki mat kiba ktah ïa kane ka jylla ne local issue ba kynthup naduh ka jingai ei ïa ka bording da 200 unit, ka jingïarap pisa ïa ki kynthei, ka jingïarap pisa ïa ki samla bym donkam don jam, ban kyntiew ïa ka jimngpynmih mar ka jylla bad ka jingkuklar ban rat dyngkhong ïa ka bamsap.
Shuh shuh la ïohi ba ka BJP ka la kynthah tyngeh ïa ka jingkular ka Congress ban kheiñ be-aiñ ïa ka Bajrang Dal ka seng shit niam Hindu da kaba ka kynnoh ba kane ka jingleh ka Congresska dei ka buit ban khroh ïa ka vote na ki rit paid ne Muslim.
Ha ka jingïalap elekshon ka Congress ka ïakhun ïa kane ka elekshon ha ka syrngiew jong ki arngut ki nongïalam na katei ka jylla u DK Shivakumar bad u Siddaramaia katba ka BJP pat lyngba u Modi hynrei lah ban sakhi ba ka jingïakhun ha ka syrngiew u Modi ha ka elekshon ha ka jylla (state election) kam shym la lah ban ïarap ïa ka BJP ban jop.
Haba kren sha ki lad pathai khubor u President ka Karnataka Congress Pradesh Committee u DK Shivakumar u la jaw ummat myllung ïa ka jingjop ka party.
“Nga la pynurlong ïa ka jingkular ba nga la khlei ha ka Sonia Gandhi, u Rahul Gandhi, ka Priyanka Gandhi, bad u nongïalam ba hakhlieh duh ka party u Mallikarjun Kharge ba ngin pynjop ïa ka party ha kane ka elekshon bad shisha ka la urlong mynta ka sngi bad nga ai burom ïa baroh ki nongtrei ka party kiba la duh thiah duh dem ryngkat bad ngi ki nongïalam na bynta ban pynthikna ba ngin ïoh ban synshar ïa ka jylla,” u la ong.
“Nga ai khublei ïa ka Sonia Gandhi bad ngan ym lah shuh ban klet kaba la wan jngoh mynba nga shah set phatok ha ka jingshahpharep ha ka BJP ba nga dei u riew bymman hynrei ka jingshaniah jong ka ha nga ban ïalam ïa ka party bad ïa ki nongkyrshan ka party na kylleng ka ri kiba la kyrshan ha ka jingjar jar ïa nga bad ka party ha ka jylla,” u la bynrap.
Na ka liang u Myntri Rangbah ka jylla u Basavaraj Bommai u la ong ba na ka liang ka party (BJP) kan sa wad ïa ki daw ba ki paidbah ki kyntait ïa ka party khnang ban lah ban leh bha ha ki elekshon ban wan.
