Ba wan poi ki phetwir na Manipur, kyrpad ka DS Madanryting ïa ka Sorkar ban pynbiang bam

Shillong, Jymmang, 13: Ka Dorbar Shnong Madanryting kaba la shong ïa ka jingïalang kaba kyrkieh ha ka sngi Saitjaiñ ka la rai ban phah da ka jingthoh sha ka Sorkar Jylla ba kan pynbiang ïa ka jaka sah bashipor, ïa ka bam ka dih bad ïa ka dawai ka dashin na ka bynta ki jaidbynriew riewlum kiba wan phet wir sha nongbah Shillong hadien ba ka la khie ka jingïaumsnam kaba shyrkhei ha ka Jylla Manipur kaba la jia haduh ka 3 tarik mynta u bnai.
Da ki hajar ngut ki riewlum ha ka Jylla Manipur ki la kylla phetwir hadien ka jingshah thombor ha ki jaidbynriew Meitei ki bym dei ki riewlum kiba la dawa ïa ka Sorkar ban ithuh noh ïa ki kum ki riewlum jong ka jylla Manipur.
Katkum ka jingïathuh jong u Rangbah Dong ka dong Block-E ka shnong Them Basuk u Bah T. Kharkongor ki don palat 150 ngut eiei ki riewlum phetwir kiba la wan poi ha ka shnong Them Basuk, Shillong naduh ka sngi Palei bad sngi Thohdieng mynta ka taiew ban jan jaka rieh tngen shipor na la ki bahaing hasem kiba buhai shnong jong kane ka jylla Meghalaya.
Ha ka jingïakren bad u nongthoh khubor u Bah Kharkongor, u la ong, “ngi kyrpad ïa ka Sorkar ba kan pynbiang da ka Relief Camp kaba biang khnang ba kan pynsuk ha kaba pynbiang ïa ka bam ka dih, ka thiah ka dem bad ka dawai ka dashin namarba na ka shnong kan kham eh ban pynbiang ïa kine ki jingdonkam bad ha kane ka aiom shit kan wan ka jingpang ba laiphewjait.”
U General Secretary ka Dorbar Shnong Madanryting u Bah Cyprian Kharkongor u la ïathuh ba ka Dorbar Shnong bad ki nongïalam jong ki jaidbynriew Hmar, Gange, Kuki bad kiwei kiwei ruh kin sa phah lang ïa ka jingthoh sha ka Sorkar ban pan ïa ki jingdonkam na ka bynta kine ki phetwir.
U la ong ruh ba ki nongïalam jong ki phetwir kim shym la pyntip satia sha ka Dorbar Shnong halor ka jingwan poi jong ki bahaing hasem bad dei halor kane ka nongrim ba ka Dorbar Shnong ka la hap ban shong kyrkieh ïa ka jingïalang ha kaba la rai ban aipor shitaiew kynthih ïa ki nongïalam jong ki phetwir ba kin phah da ka jingthoh sha u Myntri Rangbah ka Jylla u Conrad Kongkal Sangma na ka bynta ban pan ïa ka jaka rieh bad ki lad jingïada.
“Shisien ba ka Sorkar ka khot ïa ki, kam dei ban pynjynjar ïa ngi ki nongkitkam shnong,” u la ong.
U la ïathuh ba ka Dorbar Shnong ka la bthah ïa ki trai ing kiba aiwai sha kiwei pat ki jaidbynriew ba ki dei ban da pyntip shwa sha ki bor pynïaid shnong khnang ban khanglad ïa kino kino ki jingjia kiba sngewsih.
Ka Dorbar Shnong ka la bthah ruh ïa ki bahaing hasem jong ki phetwir ba ki dei ban phah ïa ki kyrteng jong ki phetwir kiba wan riehtngen shipor ha ki ing ki sem jong ki bad la bthah ruh ba kin pyntip ha ka por ba ki la mih napoh u pud u sam jong ka shnong.
Haba kylli u ïathuh ba tang ha Block-E ki phetwir ki don haduh 32 ngut hynrei katkum ka jingïoh jingtip ki don palat 100 tam ki phetwir kiba la wan poi ha ka shnong Them Basuk ïa kaba ki bor synshar shnong kim don jingtip satia shaei ki shong bad ki sah haduh mynta.