Ïaroh ka NECCC ïa ka jingstad ki nongthep vote ka Karnataka kiba kyntait ïa ka BJP

Shillong, Jymmang, 13: Ka North East Congress Coordination Committee (NECCC) ka la phah ïa u kyrwoh ai khublei ïa ki nongthep vote jong ka Jylla Karnataka kiba la pynrem bad kyntait sharud ïa ka BJP hapoh ka jingïalam jong u Myntri Rangbahduh ka ri India.
“Ngi ai khublei ïa ki paidbah ka jylla Karnataka kiba la ai ïa la ka jong ka rai bad kyntait sharud ïa ka sorkar bamsap jong ka BJP,” ong u kyrwoh ba la phah da u General Secretary jong ka NECCC u Diganta Chaudhury sha ki lad pathai khubor ha ka sngi Saitjaiñ.
“Ka Congress ka la rung sha ka jylli ïakhun elekshon halor ki mat ba la shah ktah da ki riewpaidbah bad ki briew kiba duk, kata, ki bym donkam donjam, ka bamsap, ka jingkiewdor ki marbam katba ka sorkar sorkar ‘ar enjin’ jong ka BJP ka la shahniah ha ka bor pisa bad ha ka saiñpyrthei ba wanrah ïa ka jingïapher jaitbynriew,” ong u kyrwoh.
“Ka rai kaba mynta ka sngi ka phalang ba ki paidbah ka Karnataka ki la kdup ïa ka jylli jong ka saiñpyrthei da ka jingieid ha ka jaka jong ka jingisih bad ki la thep ïa ka vote na ka bynta shongsuk shongsaiñ bad ka jingkiew irat jong ka ïoh ka kot,” ong u kyrwoh na ka NECCC.
“Ka North East Congress Coordination Committee ka ai khublei ïa u President barim ka seng Congress u Rahul Gandhi lyngba ka “Bharat Jodo Yatra” kaba la plie ïa ka bynta kaba kongsan ban tei ïa ka bor jong ka jingieid pyrshah ïa ka jingisih bad ka jingdonkam ban tei ïa ka shongsuk shongsaiñ ka ban pynkhlaiñ ïa ka ïoh ka kot ha ka ri,” bynrap u kyrwoh.
Ka NECCC ka la phah ruh ïa u kyrwoh khublei sha u President ka All India Congress Committee (AICC) u Mallikarjun Kharge, sha baroh ki nongïalam ka KPCC bad sha baroh ki nongïalam ka seng Congrees kiba la long ka kti kamon ka kti ka diang ha ka jingïalap elekshon jong ka Indian National Congress kaba pynlong ïa ka Congress ban ïoh ïa ka jingjop donburom.
“Ngi kyrmen ba u Myntri Rangbahduh ka ri u Narendra Modi bad u Myntri ka tnat Kam Pohing u Amit Shah hadien ka “Raj Dharma” mynta kin hap ban phaikhmat ban wanrah biang ïa ka shongsuk shongsaiñ ha ka jylla Manipur da kaba pynbeit lut ïa baroh ki jingbakla kiba la phiah arliang ïa ka imlang ka sahlang ha ka Jylla Manipur,” ong shuh shuh ka NECCC.